Yunusobodda bir yil avval turar joyga taqab birinchi qavat derazalari balandligida terrasa qurilgandi. Aholi haligacha uni buzdirolmayapti
Deyarli bir yil avval Gazeta Toshkentning Yunusobod tumani 8-dahasida gastroko‘cha barpo etish doirasida turar joy 1-qavat derazalari balandligida terrasa qurilgani haqida yozgandi. Aholi haligacha uni buzdira olmadi. Turli idoralar, jumladan, tuman hokimligi murojaatlarga rasmiy javoblar bilan cheklangan.
Yunusobod tumanida bir yil avval turar joy binosiga tutash, birinchi qavat derazalari balandligida qurilgan terrasa aholi tomonidan haligacha buzdirilmayapti.
"Gazeta" nashri deyarli bir yil oldin Toshkentning Yunusobod tumani 8-dahasida yashovchilar 29-uyga yondashib qurilgan terrasani buzdirishga urinayotgani haqida xabar bergan edi. Ushbu terrasa gastronomik ko‘cha tashkil etish maqsadida qurilgani aytilgan. Tuman hokimligidan tortib prokuratura va Qurilish va uy-joy kommunal xo‘jaligi sohasida nazorat qilish inspeksiyasigacha bo‘lgan turli idoralarga yuborilgan jamoaviy va shaxsiy murojaatlar hech qanday natija bermadi.
Faol Olga Smolyaninova shu vaqt mobaynida olgan bir xil mazmundagi javoblar idoralarning bir-birini qanday himoya qilishini ko‘rsatadi – ular murojaatlarga rasman javob qaytaradi, ammo shikoyatning o‘zi e’tiborsiz qoladi. Xatlarda terrasa haqida umuman so‘z yo‘q. Ularning o‘rniga Yunusobod tumani hokimligi 8-daha hududida qurilish-ta'mirlash ishlarini O‘zbekiston Vazirlar Mahkamasining "Toshkent shahri mahallalari infratuzilmasini rivojlantirish va aholi uchun qo‘shimcha qulayliklar yaratish to‘g‘risida"gi maxsus qaroriga muvofiq amalga oshirayotgani tushuntiriladi.
"Mazkur joyda bajarilayotgan ishlar mutaxassislar va shaharsozlik organlari bilan kelishilgan loyiha asosida amalga oshirilmoqda. Ularning aholi xavfsizligi, yashash sharoitlari va atrof-muhitga ta’siri o‘rganilgan. Qurilish ishlari mazkur hududda joylashgan turar joylarga zarar yetkazmaslik shartlariga rioya etilgan holda olib borilmoqda", – deyiladi shahar Qurilish va uy-joy kommunal xo‘jaligi sohasida nazorat qilish inspeksiyasining javobida.
Smolyaninovada deyarli xuddi shunday mazmundagi xatlar bir dasta. Muammo yo‘q ekan – demak, mas’ul ham yo‘q.
Birinchi qavatdagi xonadonlar aholisi bilan terrasa qurilganidan keyin deyarli ochilmay qolgan derazalar orqali suhbatlashildi.
"Bu yerda bolalar xonasi, qo‘shni derazalar esa yotoqxona. Kaftdagidek ko‘rinib turibmiz, shuning uchun hamisha derazalarni yopib o‘tirishga majburmiz. Tunda bir necha marta derazani taqillatishgan, kunduzi esa o‘tib-qaytish joyiga aylangan. Yozda bu yer xuddi tandirdek – metall qoplamadan issiqlik chiqadi, yomg‘ir yoqqanda esa boshingga urayotgandek ovoz bo‘ladi. Keyin suv to‘planib qoladi – suv chiqib ketadigan joy yo‘q, suv chiqarish tizimi qilinmagan", – deydi Yelena Pavlikova yaratilgan "qo‘shimcha qulayliklar"ni sanab.
Zuhra Usmonovaning bir xonali uyida terrasaga qaragan bittagina deraza bor.
"Derazani yopib o‘tiramiz, chunki kechasi shovqin bo‘ladi. O‘tkinchilar doim ichkariga mo‘ralaydi. Peshtoqqa ilingan peshlavha konstruksiyasi sabab yomg‘irda balkonni suv bosadi – soyabon himoya qilmaydi. Endi hammasini buzib, qayta qilishga to‘g‘ri keladi", – deydi xonadon egasi.
Zuhraning 75 yoshli onasiga ham oson emas. Keksa ayolning aytishicha, shovqin, issiq va o‘tkinchilar oyog‘i ostida bo‘shab qolgan metall qoplama chiqaradigan taqillagan ovoz sabab uxlay olmaydi.
"Mening yoshim bir joyga borib qolgan. Faqat tongga yaqin uxlayman. Endi ko‘zim ilindi deganda mashinalar keladi, yuk tushirishadi, tovarlarni topshirish punktiga tashishadi, terrasa taqillaydi. Ishni ertalab soat 6 da ham, 7 da ham boshlashadi. Odamlar 9 gacha yuradi, chiqindi tashlab ketadi: shishalar, sigareta qoldiqlari. Yo o‘zimiz tozalaymiz, yoki obodonlashtirish xodimlariga pul to‘laymiz – ular supurib berishadi", – deydi pensioner ayol.
Odamlar derazalari ostidagi ifloslikka qarshi ham, o‘z huquqlari uchun ham kurashishdan charchagan.
"Hammasi befoyda. O‘tgan yildan beri yozamiz, yuguramiz – natija yo‘q. Hech kim ishlashni xohlamaydi", – deydi aholi.
Olga Smolyaninovaning aytishicha, u chekinmoqchi emas – bunday sharoitda yashab bo‘lmaydi. U birinchi qavati hali ham turar joy bo‘lib qolgan qismda terrasani qisman buzdirishga erishmoqchi.
"Bu ifloslik, ko‘mib tashlangan daraxtlar va lyuklar – nima uchun? Pastda, metall ostida tirik yer, avvalgi gulzorlarimiz bor. Qolgan daraxtlarni chelaklab suv quyib, hech bo‘lmasa qurib qolmasligi uchun saqlab turibmiz. O‘zimiz ham butalar, gullar ekishga, ularni sug‘orishga tayyormiz – bizga mana shunday go‘zallik kerak", – deydi faol.
Dahada gastroko‘cha barpo etish ishlari 2024-yil dekabrida boshlangan. Keyingi yil bahorida 29-uy fasadini qoplash bahonasida tuman hokimligi aholidan hududni obodonlashtirish uchun og‘zaki rozilik olgan. Iyun oyi oxirida ishchilar aholini ogohlantirmasdan, avvalgi gulzorlar o‘rnida, uyga taqab va birinchi qavat derazalari sathida metall to‘siqli terrasa qurishga kirishgan. Aholining e’tirozlariga javoban Yunusobod tumani hokimligi vakillari qurilish yoqmayotganlarga "xonadonlarini sotishni" maslahat bergan.