Turizm qo'mitasi va Parashyut federatsiyasi hamkorlikni muhokama qildi

Turizm qo‘mitasi va Parashyut federatsiyasi hamkorlik aloqalarini muhokama qildi.

Toshkent, O‘zbekiston (UzDaily.uz) — Turizm qo‘mitasi rahbari Abdulaziz Aqqulov O‘zbekiston parashyut sporti federatsiyasi rahbari Aleksey Borshuk bilan uchrashdi.

Muzokaralar davomida mamlakatda ekstremal va sarguzasht turizmini rivojlantirish, bu sohada yangi turistik mahsulotlar yaratish hamda mavjud imkoniyatlardan samarali foydalanish masalalari ko‘rib chiqildi.

Qayd etilishicha, hozirda parashyutdan sakrash mashg‘ulotlari Sirdaryo tumanidagi "Sirdaryo markaziy" maydonida o‘tkazilmoqda. Qulay iqlim sharoitlari, uzoq parvoz mavsumi va mavjud infratuzilma O‘zbekistonni ekstremal turizmni rivojlantirish uchun istiqbolli yo‘nalishlardan biriga aylantirmoqda.

Uchrashuvda xorijiy va mahalliy sayyohlar uchun parashyut turizmi xizmatlarini yanada ommalashtirish, xalqaro musobaqalar va festivallarni tashkil etish orqali hududlarning turistik jozibadorligini oshirish masalalariga ham alohida e’tibor qaratildi.

Shuningdek, sohani huquqiy jihatdan takomillashtirish va ekstremal turizmni rivojlantirishga qaratilgan tashabbuslar yuzasidan federatsiya tomonidan tegishli takliflar ishlab chiqilishiga kelishib olindi.