Toshkentda bir qator ko‘chalar uch kunga yopiladi
Toshkent shahrida Mustaqillik shohko‘chasining ikkinchi bosqichida asfalt yotqizish ishlarini yakunlash munosabati bilan 31 iyul kechasidan 3 avgust kechasiga qadar ayrim ko‘chalarda barcha turdagi transport vositalari harakati vaqtincha cheklanadi. Haydovchilarga harakat yo‘nalishlarini oldindan rejalashtirish tavsiya etildi.
Toshkentda ayrim ko‘chalar uch kun muddatga yopiladi.
Toshkent shahar hokimligining xabar berishicha, ushbu vaqtinchalik cheklovlar 2026-yil 31-iyul soat 23:00 dan 3-avgust soat 22:00 gacha davom etadi.
Unga ko‘ra, Oqqo‘rg‘on ko‘chasining Mustaqillik shohko‘chasi bilan kesishgan joyidan Osiyo ko‘chasigacha bo‘lgan qismi, shuningdek, Parkent ko‘chasining Mustaqillik shohko‘chasi kesishmasidan Parkent-2 ko‘chasigacha bo‘lgan qismi transport harakati uchun yopiladi.
Ma’lum qilinishicha, bu cheklovlar asfalt yotqizish ishlarini sifatli va xavfsiz yakunlash, yo‘l infratuzilmasini bosqichma-bosqich yaxshilash hamda harakat xavfsizligini ta’minlash maqsadida joriy etilmoqda.
Shahar hokimligi haydovchilardan yuzaga kelishi mumkin bo‘lgan noqulayliklar uchun uzr so‘rab, ushbu davrda boshqa yo‘nalishlardan foydalanishni hamda safarlarni oldindan rejalashtirishni tavsiya qildi.