Surxondaryoda 25 mlrd so‘mlik firibgarlik sxemasi aniqlandi
Surxondaryo viloyatida soxta hujjatlardan foydalangan holda 25 milliard so‘mlik mablag‘ni qo‘lga kiritish bilan bog‘liq yirik firibgarlik sxemasi fosh etildi. Holat yuzasidan jinoyat ishi qo‘zg‘atilib, tergov harakatlari olib borilmoqda.
Surxondaryoda 25 milliard so‘mlik firibgarlik sxemasi fosh etildi.
Bosh prokuratura huzuridagi Departamentning Surxondaryo viloyati boshqarmasi tomonidan o‘tkazilgan tergovga qadar tekshiruv davomida "T.K." MChJ ta’sischisi Sh.Sh. va boshqa shaxslarning g‘ayriqonuniy xatti-harakatlari aniqlandi.
Tekshiruv natijalariga ko‘ra, ular tijorat banklaridan biri va "I." MChJ o‘rtasida tuzilgan shartnomaga asosan, avvaldan garovda bo‘lgan bino-inshootlarga oid soxta hujjatlarni tayyorlab, ushbu mulkni ikkinchi marotaba garovga qo‘yishgan.
Buning oqibatida, ushbu hujjatlar asosida Andijon viloyatidagi tijorat banklaridan biridan 25 milliard so‘m miqdorida mablag‘ ajratilishiga erishilgan va bu mablag‘lar talon-toroj qilingani ma’lum bo‘ldi.
Mazkur holat yuzasidan Jinoyat kodeksining tegishli moddalari bilan jinoyat ishi qo‘zg‘atilgan. Hozirda ish bo‘yicha tergov harakatlari davom etmoqda.