Shenchjenda tomi park shaklida bo‘lgan ulkan muzey ochildi — u Yerning butun tarixiga bag‘ishlangan (video)
Shenchjenda Yerning butun tarixiga bag‘ishlangan, tomi park shaklida bo‘lgan ulkan muzey ochildi (video)
Xitoyning Shenchjen shahrida dunyodagi eng yirik muzeylardan biri hisoblangan yangi Tabiiy tarix muzeyi o‘z faoliyatini boshladi. Maydoni 105 ming kvadrat metrdan ortiq bo‘lgan ushbu majmua Pinshan tumanidagi Yanszi ko‘li sohilida joylashgan bo‘lib, Xitoy janubi tabiatiga bag‘ishlangan ilk yirik inshootga aylandi.
Loyihani Daniyaning 3XN arxitektura byurosi B+H Architects va Zhubo Design kompaniyalari bilan hamkorlikda ishlab chiqqan. Me’morlar an’anaviy bino o‘rniga atrofdagi landshaftning tabiiy davomidek tuyuladigan silliq, haykaltaroshlik shaklini yaratgan. Tomning aksariyat qismi sayr qilish uchun ochiq bo‘lib, tashrif buyuruvchilar hatto ichkariga kirmasdan ham botqoqlik va ko‘l manzaralaridan bahramand bo‘lishlari mumkin.
Muzeyda ko‘rgazma zallaridan tashqari, tadqiqot laboratoriyalari, ilmiy kolleksiyalar, ta’lim maydonchalari hamda antropolog, zoolog va boshqa mutaxassislar uchun ish xonalari joy olgan. Shuningdek, bu yerda astronomik rasadxona ham faoliyat yuritadi.
Ekspozitsiya Yerning qariyb 4,6 milliard yillik tarixini – sayyoraning shakllanishi va ilk organizmlarning paydo bo‘lishidan tortib, dinozavrlar davri, sutemizuvchilar va insoniyatning vujudga kelishigacha bo‘lgan davrni qamrab oladi. Alohida bo‘limlar Janubiy Xitoy, jumladan, Guandun provinsiyasi va Marvarid daryosi deltasining bioxilma-xilligiga bag‘ishlangan.
Garchi muzey dinozavrlarga katta e’tibor qaratsa-da, uni yaratganlar mintaqaning zamonaviy ekotizimlariga ham alohida urg‘u bergan. Ekspozitsiyalarda mahalliy turlarning evolyutsiyasi, shuningdek, noyob hayvonlar va ularning yashash muhitini saqlab qolishga qaratilgan hozirgi sa’y-harakatlar haqida hikoya qilinadi.
Yangi muzey nafaqat sayyohlar uchun diqqatga sazovor maskan, balki tabiiy tarix sohasidagi xalqaro tadqiqot markaziga aylanishi maqsad qilingan. Shu bilan birga, jamoat joylariga, jumladan, sayr qilish mumkin bo‘lgan tom qismiga kirish bepul bo‘lib, bu majmuaning bir vaqtning o‘zida ham ilmiy muassasa, ham shahar parki vazifasini bajarishiga imkon beradi.