Senat Rossiyaga qarshi yangi sanksiyalar paketi bo‘yicha kelishuvga erishdi
AQSh Senatida respublikachi va demokrat senatorlar Rossiya va Eronga qarshi yangi sanksiyalar haqidagi qonun loyihasini qo‘llab-quvvatlash bo‘yicha kelishuvga erishdi. Hujjat qabul qilinsa, AQSh prezidenti Donald Tramp Rossiya nefti, gazi va uranini xarid qiluvchi davlatlardan import qilinadigan mahsulotlarga 100 foizgacha tarif joriy etish huquqiga ega bo‘ladi.
Senat Rossiyaga qarshi yangi sanksiyalar paketini kelishib oldi
Bloomberg agentligining xabar berishicha, Senatdagi ikki partiya vakillari Rossiya va Eronga qarshi yangi sanksiyalarni o‘z ichiga olgan qonun loyihasi bo‘yicha kelishuvga erishdilar.
Ushbu loyiha AQSh prezidentiga Rossiyadan import qilinadigan tovarlarga 500 foizlik boj joriy etish vakolatini beradi. Shuningdek, Rossiya nefti, tabiiy gazi yoki uranini sotib oladigan, yoxud Moskvaga amaldagi sanksiyalarni chetlab o‘tishda yordam beradigan mamlakatlardan import qilinadigan mahsulotlarga ham 100 foizgacha tarif belgilash imkoniyati yaratiladi.
Hujjatga ko‘ra, bu vakolatlar qonun kuchga kirganidan keyin besh yil davomida amal qiladi. Qonun loyihasi mualliflaridan biri yaqinda vafot etgan respublikachi senator Lindsi Grem edi.
Bloomberg ta’kidlashicha, bu tashabbus AQShning Xitoy va Hindiston bilan savdo munosabatlariga ta’sir ko‘rsatishi mumkin, chunki bu ikki davlat Rossiya energetika resurslarining eng yirik xaridorlari hisoblanadi. Shu sababli ayrim demokrat senatorlar prezidentga bunday keng vakolatlar berilishidan xavotir bildirmoqda.
Qonun loyihasi shu haftayoq Senatda qabul qilinishi mumkin, ammo u sentyabrdan avval kuchga kirmaydi, chunki AQSh Kongressining quyi palatasi – Vakillar palatasi yozgi ta’tilga chiqqan.
Donald Tramp avvalroq 2025 yilda tayyorlangan ushbu qonun loyihasini qo‘llab-quvvatlashdan bosh tortgan edi. U Rossiya va Eronga nisbatan sanksiyalarni kuchaytirish yoki yumshatish bo‘yicha prezident vakolatlarini yanada kengaytirishni talab qilgan. Biroq Lindsi Grem vafotidan keyin va qonun loyihasiga ayrim o‘zgartishlar kiritilgach, Oq uy bu tashabbusni qo‘llab-quvvatlashga qaror qildi.
Tramp ma’muriyati avval ham Rossiyani Ukrainadagi urushni tugatish bo‘yicha muzokaralarga undash maqsadida sanksiya bosimini kuchaytirishga uringan edi. Biroq Eron bilan mojaro paytida Ho‘rmuz bo‘g‘ozi atrofidagi vaziyat keskinlashgach, jahon bozorida energiya narxlarining keskin oshib ketishining oldini olish maqsadida Rossiya nefti bilan bog‘liq ayrim operatsiyalarga nisbatan cheklovlar vaqtincha yumshatilgan edi.