Rossiya va Qirg‘iziston yagona mobil aloqa operatori yaratadi

Rossiya va Qirg‘iziston yagona mobil aloqa operatorini tashkil etishga kelishib oldilar. Bu haqda Rossiya–Qirg‘iziston taraqqiyot jamg‘armasi rahbari Artyom Novikov ikki mamlakatning iqtisodiy forumida ma’lum qildi.

Hozircha ushbu loyihaning amalga oshirish muddatlari va boshqa tafsilotlari oshkor etilmagan. Rossiya Raqamli rivojlanish va ommaviy kommunikatsiyalar vazirligi rahbari bu tashabbusni ikki davlatning raqamlashtirish sohasidagi eng muhim loyihalaridan biri deb baholadi.

Yangi tizim ishga tushirilgach, abonentlar SIM kartani almashtirmasdan va rouming to‘lovlarini to‘lamasdan har ikki mamlakatda ham mobil aloqa va internet xizmatlaridan foydalanish imkoniyatiga ega bo‘ladilar.

Artyom Novikovning so‘zlariga ko‘ra, "Qirg‘iziston va Rossiya o‘rtasida yagona mobil operator yaratish bo‘yicha kelishuv imzolandi. Bu ikki davlat fuqarolarining o‘zaro qatnovi va muloqotini sezilarli darajada osonlashtiradi".

Iqtisodiy forum yakunlariga ko‘ra, Rossiya va Qirg‘iziston o‘rtasida umumiy qiymati 800 million dollardan ortiq bo‘lgan 40 dan ziyod hujjat imzolangan. Ushbu hujjatlar orasida quyosh elektr stansiyalarini qurish va Qirg‘iziston temir yo‘llari infratuzilmasini rivojlantirish loyihalari ham mavjud. Shuningdek, Rossiya–Qirg‘iziston taraqqiyot jamg‘armasi kapitalini 1 milliard dollarga yetkazish rejalashtirilmoqda.