“Real” Vinisiusga ultimatum qo‘ydi — Marca

“Real” Vinisiusga yakuniy shart qo‘ydi — Marca

Madridning “Real” klubi rahbariyati jamoa hujumchisi Vinisius Juniorga shartnomani uzaytirish bo‘yicha qat’iy talab qo‘ydi. Marca nashrining xabar berishicha, braziliyalik futbolchiga vaziyat aniq tushuntirilgan: u hozir taklif qilingan yangi shartnomani imzolashi kerak, aks holda jamoa unga boshqa bunday taklif bilan chiqmaydi.

Agar vinger kelishuvni uzaytirishdan bosh tortsa, “qaymoqranglilar” rahbariyati uni transferga qo‘yish va sotib yuborish variantini jiddiy ko‘rib chiqadi. Ta’kidlanishicha, ushbu vaziyatni futbolchiga jiddiy qiziqish bildirayotgan Londonning “Arsenal” klubi diqqat bilan kuzatib bormoqda. Agar vaziyat kutilganidek rivojlansa, “to‘pchilar” braziliyalik futbolchiga shartnoma taklif qiladi.

Ma’lumot uchun, Vinisius 2018-yilning yozidan buyon “Real” sharafini himoya qilib kelmoqda. Shu vaqt ichida u barcha turnirlar doirasida jami 375 ta o‘yinda maydonga tushib, 128 ta gol urgan va 100 ta golli uzatmani amalga oshirgan. Futbolchining Madrid klubi bilan amaldagi shartnomasi 2027-yilning yoziga qadar mo‘ljallangan bo‘lib, Transfermarkt portali uning hozirgi bozor qiymatini 140 million yevroga baholamoqda.