“Ravshan Komilovning raqqosasi emasmiz” — Malika Qurbonova odamlarning gap-so‘zlari va hayotidagi armonlari haqida
**Malika Qurbonova: "Ravshan Komilovning raqqosasi emasmiz" — Odamlarning gap-so‘zlari va hayotidagi armonlari haqida**
Raqqosa Malika Qurbonova "Darakchi" YouTube kanaliga bergan intervyusida oila va kasb o‘rtasidagi muvozanatni saqlash, sahna faoliyatini davom ettirish rejalari hamda oilaviy munosabatlarda muhabbatning ahamiyati haqida so‘zlab berdi.
**"Men uchun birinchi o‘rinda oilam, so‘ng san’atim turadi"**
Malika Qurbonova ta’kidlashicha, uning hayotida oila birinchi o‘rinda turadi, san’at esa ikkinchi. Biroq, u hozirda ikkalasini ham teng olib borishga harakat qiladi, chunki ikkalasi ham uning uchun muhim va qadrli. Raqqosaning fikricha, ayol kishiga bu ikki narsani teng olib borish juda qiyin, chunki ayollarning zimmasida oila, farzandlar, turmush o‘rtoq, qaynona-qaynotaning oldidagi mas’uliyat ko‘proq. Erkak san’atkorlarga bu borada osonroq ekanligini ham qo‘shimcha qildi.
U oilasini ham, kasbini ham sevishini, raqsdan kechish qiyinligini aytdi. San’atga pul uchun kirmaganini, inson kasbini yaxshi ko‘rsa, uni tark etishi og‘riqli bo‘lishini ta’kidladi. San’atdan qachon ketishini hech kim bilmasligini, hammasi Allohdan ekanligini, har bir ishning boshlanishi bo‘lgani kabi yakuni ham borligini, shu sababli har bir ishida chiroyli yakun bo‘lishini istashini bildirdi.
**"Ota-onam uchun ham san’atni tark etgim kelmaydi"**
Malika Qurbonova san’atni tark etish niyati yo‘qligini aytdi, chunki bu umr va yillar bilan bog‘liq narsa. Opasining ma’lum sabablar bilan san’atdan uzoqlashganini, uning boshqa yo‘lni tanlaganini va buni qo‘llab-quvvatlashini bildirdi. O‘ziga keladigan bo‘lsa, hozircha ketish niyati yo‘qligini, qachondir baribir buning ham oxiri bo‘lishini bilishini aytdi. Niyati — peshonasiga yozilgan bo‘lsa, faoliyatini chiroyli yakun bilan tugatish, chunki keyinchalik muxlislar ularni yaxshi xotiralar bilan eslashini xohlaydi. Uning fikricha, kasbini yaxshi ko‘rgan odam qachon tark etishini, dam olish yoki tanaffus qilishni o‘ylamaydi, Xudo peshonasiga qanday yozgan bo‘lsa, shunday davom etaveradi.
**"Ravshan Komilovning raqqosasi emasman"**
Raqqosa ko‘pchilik uni va opasini Ravshan Komilovning raqqosasi deb atashini, bu juda g‘alati eshitilishini aytdi. Ushbu xonandaning kliplarida raqs ijro etishlari aslida alohida o‘ylangan strategiya emasligini ta’kidladi. Qaysidir xonanda bilan qaysidir raqqosa yaxshi tandem bo‘lishini, misol uchun, xonanda Imron bilan Durdona Qurbonova, Alisher Fayz bilan Parizoda yoki opasi bilan o‘zida Ravshan Komilovni misol qilib keltirdi. Bularning hammasi tasodifiy tandem ekanligini, oldindan nima bo‘lishini hech kim bilmasligini, tandem yaxshi ketsa, keyinchalik yana ijodiy faoliyatni davom ettirishlarini, bu esa omad va mehnatga bog‘liq ekanligini bildirdi.
**"Hayotimdagi og‘riqli nuqtam — ota-onamni yo‘qotganim"**
Malika Qurbonova opasi bilan birgalikdagi eng katta orzusi bolalik davriga qaytish, oila davrasida, ota-onalari bilan birga bo‘lishni juda xohlashlarini aytdi. Chunki bugungi kunda ular yonlarida emas, vafot etishgan. Ular bilan o‘tgan yillarni juda sog‘inishlarini bildirdi. Hayotida bittagina og‘riqli nuqtasi borligini, bu ota-onalarini yo‘qotganliklari ekanligini, opasi uchun ham xuddi shundayligini ta’kidladi. Hayotning qolgan barcha qiyinchiliklarini yenga olishini, bunga kuchi ham, sabri ham yetishini, haqiqatda bardoshli ayol ekanligini aytdi. Hayotdagi birdan-bir kemtigi — ota-onasizlikka ko‘nikishi qiyinligi, bu og‘riq ketishi qiyin, ketolmaydi ham. Shukr, hamma narsasi: oilasi, turmush o‘rtog‘i, farzandlari borligini aytdi.
Opasi bilan birga: "Qaniydi bir kungina imkon bo‘lsa-yu, qizlik uyimizda ota-onamiz bilan hammamiz birga o‘tirib ovqatlar tayyorlab, dasturxon atrofida jam bo‘lsak edi", deyishlarini, ular bilan o‘tkazgan damlarini sog‘inishlarini bildirdi. Ular oddiy odamlar bo‘lishganini, oilalari oylikdan oylikka yashaydigan o‘qituvchilar oilasi bo‘lganini, o‘zlari yemay-ichmay ularni katta qilishganini aytdi. Onasi bilan dadasi ularni sahnada ko‘rishni juda orzu qilishganini, farzand katta qilishning qanchalar qiyinligini o‘zlari ona bo‘lib, endi tushunayotganliklarini ta’kidladi.
Bugun ota-onasi uchun ham san’atni davom ettirishni xohlashini, chunki onasi umrlarini ularning kelajagi uchun baxshida qilganini, syomkalarga doim ular bilan borganini, kerak bo‘lsa, kechgacha ularni kutib o‘tirganini, shu bilan o‘zlarining orzularini unutganini aytdi Malika Qurbonova.
**"Turmush o‘rtog‘imdan minnatdorman"**
Malika Qurbonova yonida borligi uchun turmush o‘rtog‘iga rahmat aytdi. Uning turmush o‘rtog‘i har doim qo‘llab-quvvatlashini, ikki nafar guldek farzandlari borligini, unga ishonishini, ruxsat berishini, qolaversa, og‘ir-vazmin, yaxshi inson ekanligini ta’kidladi. Eng asosiysi, ulardan farzandlari uchun minnatdor ekanligini aytdi. Chunki o‘qishni bitirib, ijod qilganini, boshqa qizlarga nisbatan kechroq, 26 yoshda turmushga chiqqanini, turmushlarining boshida ozroq vaqt farzand bo‘lmaganini, shu sababli farzand ne’mati uning uchun juda qadrli ekanligini bildirdi.
**"Hamma narsa muhabbat asosida quriladi"**
Raqqosa baxtli oila qurish uchun muhabbatning o‘zi yetarli ekanligini aytdi. Tajribasidan kelib chiqqan holda, oilada muhabbat juda muhimligini, har bir narsa muhabbat asosida qurilishini ta’kidladi. Masalan, kasbga ham muhabbat asosida erishilishini, farzandlarga ham mehr-muhabbat kerakligini aytdi. Agar dunyoda muhabbat bo‘lmasa, hayot ham bo‘lmasligini, mehr-muhabbat, oqibat borki, dunyo turibdi. Shuning uchun oilada o‘zaro muhabbatning bo‘lishi juda muhim deb hisoblashini, chunki bir-birini yaxshi ko‘rgan oila a’zolari bir-birlarini kechira olishini, ayblar, xatolar ko‘zga ko‘rinmasligini aytdi. Birgalikdagi hayot davomida duch kelinadigan to‘siqlar ham muhabbat tufayli birga yengib o‘tilishini, muhabbatni, bir-birini e’zozlashni ota-onasidan o‘rganganini bildirdi.