Peru klubi o'z libosiga 1000 ta homiyning nomini joylashtirdi

Peru klubi o'z libosiga 1000 ta homiyning nomini joylashtirdi.

Moliyaviy qiyinchiliklar tufayli havaskorlar ligasiga tushib ketgan va bankrotlik yoqasiga kelib qolgan Peruning "Deportivo Municipal" klubi noodatiy kampaniya boshladi. To'rt karra Peru chempioni bo'lgan ushbu klub mablag' yig'ish maqsadida o'z formasini 1000 ta kichik bo'lakka bo'lib, ularni sotuvga qo'ydi.

Mahalliy kompaniyalar, kichik tadbirkorlar va hatto oddiy muxlislar ham klub libosidagi bu joylarni 25 yevrodan 150 yevrogacha bo'lgan narxda sotib olish imkoniyatiga ega bo'ldilar. Buning evaziga homiylar ijtimoiy tarmoqlarda reklama, chiptalar va tovarlarga chegirmalar, shuningdek, futbolchilar orqali o'z bizneslarini targ'ib qilish imkoniyatini qo'lga kiritdilar.

Ushbu tashabbus natijasida klub taxminan uch oy ichida barcha 1000 ta joyni sotib, yillik xarajatlarini qoplash uchun yetarli mablag' to'plashga muvaffaq bo'ldi.

McCann Lima agentligi bilan hamkorlikda ishlab chiqilgan ushbu original g'oya uchun agentlik Cannes Lions 2026 festivalida bosh sovrinni qo'lga kiritdi. Cannes Lions dunyodagi eng yirik reklama va kreativ marketing festivali bo'lib, Kannda o'tkaziladi.