O‘zbekistonda milliy to‘lov svitchini 2027-yilda ishga tushirish rejalashtirilmoqda

O‘zbekistonda 2027-yilda milliy to‘lov svitchi tizimini ishga tushirish rejalashtirilmoqda. Bu tizim barcha milliy valyutadagi to‘lovlarni qayta ishlashga mo‘ljallangan. Bu haqda Markaziy bankning To‘lov tizimlarini rivojlantirish departamenti rahbari Jamshid Usmonov Spot nashriga bergan intervyusida ma’lum qildi.

Mutaxassisning so‘zlariga ko‘ra, ushbu loyiha prezident qarori bilan tasdiqlangan jadval asosida amalga oshirilmoqda. Hozirda tizimni joriy etish uchun zarur bo‘lgan me’yoriy-huquqiy hujjatlar ishlab chiqilmoqda. Texnik implementatsiya ishlari keyingi bosqichlarda amalga oshiriladi.

Markaziy bank vakilining ta’kidlashicha, milliy to‘lov svitchi mamlakat ichidagi operatsiyalar uchun yagona infratuzilmaga aylanadi. Hozirda xalqaro bank kartalari orqali amalga oshiriladigan ayrim tranzaksiyalar xorijdagi protsessing markazlarida qayta ishlanayotgan bo‘lsa, yangi tizim bunday operatsiyalarni O‘zbekiston hududida qayta ishlash imkonini beradi.

Jamshid Usmonovning so‘zlariga ko‘ra, "Milliy svitch xorijiy kompaniyalarga qaramlikni kamaytiradi va to‘lovlarga oid ma’lumotlarni mamlakat ichida qayta ishlash imkonini yaratadi".

Shuningdek, u yangi tizim to‘lov infratuzilmasining barqarorligi va ma’lumotlar himoyasi darajasini oshirishga xizmat qilishini ta’kidladi.

Eslatib o‘tamiz, 2026-yil iyul oyidan Yagona UzQR tizimi ishga tushgandi. Markaziy bankning ma’lum qilishicha, 0,65 foizlik yagona tarif xaridorlardan emas, balki savdo va xizmat ko‘rsatish korxonalaridan undiriladi.

Yagona UzQR tizimi istalgan bank yoki to‘lov ilovasi orqali bitta QR kod yordamida to‘lovni amalga oshirish imkonini beradi. Uning maqsadi turli bank va to‘lov xizmatlari o‘rtasidagi integratsiyani kengaytirish hamda naqd pulsiz hisob-kitoblarni rivojlantirishdan iborat.