O‘zbekistonda kam ta’minlangan oilalarga olti oyda 179 mlrd so‘mdan ko‘proq ijtimoiy keshbek to‘lab berildi

O‘zbekistonda kam ta’minlangan oilalarga joriy yilning dastlabki olti oyida 179 milliard so‘mdan ortiq ijtimoiy keshbek berildi. Bu haqda Soliq qo‘mitasi ma’lum qildi.

Qo‘mita taqdim etgan raqamlarga ko‘ra, 2026-yilning yanvaridan iyungacha bo‘lgan davrda 651,3 ming nafar iste’molchiga xarid cheklari asosida jami 179,2 milliard so‘m ijtimoiy keshbek to‘langan. Ushbu olti oy ichida tizimda 6 million 11,9 mingta xarid cheki ro‘yxatdan o‘tkazilgan.

Hududlar bo‘yicha eng ko‘p keshbek Andijon viloyatiga to‘g‘ri kelgan bo‘lib, bu yerda fuqarolarga 96,3 milliard so‘m qaytarilgan. Ikkinchi o‘rinda Toshkent shahri 15,2 milliard so‘m bilan, uchinchi o‘rinda esa Samarqand viloyati 14 milliard so‘m bilan qayd etilgan.

Eslatib o‘tamiz, 2023-yil 1-maydan boshlab "Ijtimoiy himoya yagona reyestri"ga kiritilgan fuqarolar ayrim mahsulotlarni sotib olganda, odatdagi 1 foizlik keshbek o‘rniga, xarid summasining 12 foizi miqdoridagi qo‘shilgan qiymat solig‘ini (QQS) ijtimoiy keshbek sifatida qaytarib olish imkoniyatiga ega bo‘lganlar.

Shuni ham ta’kidlash joizki, 2026-yilning yanvar—mart oylarida 621,6 ming nafar iste’molchiga qariyb 161,5 milliard so‘m ijtimoiy keshbek to‘langan edi. Faqatgina mart oyining o‘zida 65,1 million so‘m QQS qaytarilgan.