O‘zbekistonda 6 oyda 614 ming tonnadan ortiq benzin ishlab chiqarildi
Shuningdek, tabiiy gaz va neft ishlab chiqarish hajmlari ham ma’lum qilindi
O‘zbekistonda 2026-yilning dastlabki olti oyida 614 ming tonnadan ziyod benzin ishlab chiqarildi.
Milliy statistika qo‘mitasining xabar berishicha, 2026-yilning yanvaridan iyunigacha bo‘lgan davrda mamlakatda jami 614,2 ming tonna avtomobil benzini ishlab chiqarilgan.
Xuddi shu davr mobaynida sanoat korxonalari tomonidan 568 ming tonna dizel yoqilg‘isi hamda 313,8 ming tonna neft qazib olindi.
Tabiiy gaz ishlab chiqarish hajmi 18,3 milliard kub metrga yetgan bo‘lsa, gaz kondensati ishlab chiqarish 462,1 ming tonnani tashkil etdi.
Hisobotda yoqilg‘i-energetika mahsulotlaridan tashqari, boshqa sanoat mahsulotlarining ishlab chiqarish ko‘rsatkichlari ham keltirilgan.
Jumladan, 2026-yilning birinchi yarmida mamlakatda 2,5 million tonna ko‘mir qazib chiqarilgan.
Shuningdek, sanoat korxonalari tomonidan 126,7 ming dona avtomobil dvigateli ishlab chiqarilgani qayd etildi.