O‘zbekiston YeOIIga “Innoprom” kelishuvlari asosida sanoat sohasida hamkorlikni taklif qildi

O‘zbekiston Yevroosiyo iqtisodiy ittifoqi (YeOII) a’zolariga sanoat sohasida hamkorlik dasturini ishlab chiqishni taklif qildi. Bu taklif Toshkentda bahorda bo‘lib o‘tgan "Innoprom. Markaziy Osiyo" ko‘rgazmasida erishilgan kelishuvlarga asoslanadi. Bu haqda TASS xabariga ko‘ra, bosh vazir Abdulla Aripov ma’lum qildi.

Qirg‘izistonda bo‘lib o‘tgan Yevroosiyo hukumatlararo kengashi yig‘ilishida Aripov shunday dedi: "Sanoat kooperatsiyasini yangi bosqichga olib chiqish. 'Innoprom. Markaziy Osiyo' ko‘rgazmasi doirasidagi kelishuvlar bazasida qo‘shma kooperatsiya dasturini tayyorlashni taklif etamiz".

O‘zbekiston tomoni ushbu hujjatga istiqbolli loyihalar, ishlab chiqarish maydonchalari, hamkorlar va aniq moliyalashtirish manbalari ro‘yxatini kiritishni taklif etdi. Shuningdek, O‘zbekiston hukumati Yevroosiyo iqtisodiy komissiyasi bilan hamkorlik qiladigan kooperatsiya ofisini mamlakatda ochishga tayyorligini bildirdi.

Bosh vazirning ta’kidlashicha, bu taklif prezident Shavkat Mirziyoyevning may oyida Qozog‘istonda bo‘lib o‘tgan Oliy Yevroosiyo iqtisodiy kengashining yig‘ilishida ilgari surgan O‘zbekiston va YeOII o‘rtasidagi hamkorlikni rivojlantirish tashabbuslarini amalda ro‘yobga chiqarish yo‘nalishlaridan biridir.

Yevroosiyo hukumatlararo kengashining yig‘ilishi 6-7-avgust kunlari Issiqko‘l viloyatining Cho‘lponota shahrida bo‘lib o‘tmoqda. Unda Rossiya hukumati raisi Mixail Mishustin, Armaniston bosh vaziri Nikol Pashinyan, Belarus hukumati rahbari Aleksandr Turchin, Qozog‘iston bosh vaziri Oljas Bektenov, shuningdek, Eron va Kuba vakillari ishtirok etmoqda.

Shu bilan birga, Qirg‘iziston prezidenti Sadir Japarov Yevroosiyo iqtisodiy ittifoqiga a’zo davlatlar (O‘zbekiston – kuzatuvchi) hukumat rahbarlari bilan uchrashuv o‘tkazdi.