O‘zbekiston va Qirg‘iziston ittifoqchiligi, 5 foizlik soliq taklifi va keksa ayol uyi bo‘yicha jinoyat ishi – mahalliy dayjyest

O‘zbekiston va Qirg‘iziston ittifoqchilik munosabatlarini o‘rnatdi, bank omonatlariga 5 foizlik soliq taklif qilindi va keksa ayolning uyi bilan bog‘liq jinoyat ishi qo‘zg‘atildi – Kun.uz mahalliy yangiliklar dayjyesti.

**O‘zbekiston va Qirg‘iziston ittifoqchilik munosabatlarini o‘rnatdi**

Cho‘lponota shahrida bo‘lib o‘tgan oliy darajadagi muzokaralar chog‘ida O‘zbekiston Prezidenti Shavkat Mirziyoyev va Qirg‘iziston Prezidenti Sadir Japarov Ittifoqchilik munosabatlari to‘g‘risidagi shartnomani imzoladilar.

Muzokaralar davomida tomonlar yaqin yillarda savdo hajmini 2 milliard dollarga yetkazish, energetika, transport, sanoat kooperatsiyasi va "Xitoy-Qirg‘iziston-O‘zbekiston" temir yo‘li loyihasini jadallashtirish masalalarini muhokama qildilar.

Shuningdek, davlat rahbarlari munosabatlarni muvofiqlashtiruvchi Davlatlararo kengash tuzishga kelishib oldilar. Bu tuzilma ikki mamlakat o‘rtasidagi hamkorlikni eng yuqori darajada muvofiqlashtiruvchi yangi mexanizm bo‘ladi.

Bundan tashqari, davlat rahbarlari huzurida davlat chegarasi, "Chashma" bulog‘idan foydalanish, pensiya ta’minoti, ta’lim, turizm va boshqa sohalarga oid qator ikki tomonlama hujjatlar almashildi.

**Bank omonatlari foiziga 5 foizlik soliq taklif qilindi**

Iqtisodiyot va moliya vazirligi huzuridagi Fiskal tahlillar instituti bank omonatlari bo‘yicha foiz daromadlariga 5 foizlik soliq joriy etishni taklif qildi.

Taklifga ko‘ra, omonatlardan olinadigan foizlar dividendlar bilan tenglashtirilib, ularga ham 5 foizlik stavka qo‘llanishi mumkin. Buning uchun Soliq kodeksiga o‘zgartirish kiritish talab etiladi.

Institut hisob-kitobicha, agar taklif qabul qilinsa, davlat byudjetiga yiliga qariyb 1,4 trillion so‘m qo‘shimcha tushum kelishi mumkin.

**Maktablarda dars yuklamasini taqsimlash tartibi o‘zgardi**

Yangi o‘quv yilidan boshlab umumta’lim maktablarida o‘qituvchilar o‘rtasida dars yuklamasini taqsimlashning yangilangan tartibi joriy etiladi.

Yangi tartibga ko‘ra, dars soatlarini taqsimlashda asosiy e’tibor pedagogning kasbiy mahorati, milliy yoki xalqaro sertifikatlari hamda ta’limda erishgan natijalariga qaratiladi. Shuningdek, ustuvorlik mezonlari 19 tadan 10 taga qisqartirilgan.

Ayrim imtiyozli mezonlar bekor qilinib, barcha o‘qituvchilar uchun teng imkoniyat yaratiladi. Yangi tizim 2026-2027 o‘quv yilidan amal qila boshlaydi.

**1 avgustdan “Tashabbusli byudjet”da yangi tartib joriy etiladi**

1 avgustdan boshlab “Tashabbusli byudjet” jarayonida xalq deputatlari kengashlari deputatlarining vakolatlari kengayadi.

Yangi tartibga ko‘ra, har bir deputat "Ochiq byudjet" portalida o‘ziga ajratilgan mablag‘lar doirasida bir yoki bir nechta loyihani qo‘shimcha ravishda g‘olib deb e’lon qilishi mumkin.

Shuningdek, deputatning vakolati muddatidan oldin tugatilsa, qo‘shimcha g‘olib loyihalar tegishli komissiya qarori bilan boshqa deputatlar tomonidan belgilanadi. Yangi tartib aholi tashabbuslarini qo‘llab-quvvatlash va deputatlarning jarayondagi ishtirokini kuchaytirishga qaratilgan.

**Toshkentda keksa ayol uyi bo‘yicha jinoyat ishi qo‘zg‘atildi**

Toshkent shahrida yolg‘iz yashovchi 86 yoshli ayolning uyi boshqa shaxs nomiga o‘tkazilgani haqida ijtimoiy tarmoqlarda tarqalgan holat yuzasidan jinoyat ishi qo‘zg‘atildi. Bu haqda Bosh prokuratura ma’lum qildi.

Tergovga ko‘ra, Mirzo Ulug‘bek tumanida yashovchi keksa ayolga tegishli xonadon 2025 yil sentyabr oyida notarial tartibda rasmiylashtirilgan oldi-sotdi shartnomasi asosida boshqa shaxs nomiga o‘tkazilgan. Huquqni muhofaza qiluvchi organlar ayol o‘z harakatlarining ahamiyatini anglash qobiliyatiga ega bo‘lgan-bo‘lmagani hamda firibgarlik qurboni bo‘lgan bo‘lishi mumkinligini tekshirmoqda.

Holat yuzasidan Jinoyat kodeksining 168-moddasi 4-qismi "a" bandi, ya’ni juda ko‘p miqdordagi firibgarlik alomatlari bilan jinoyat ishi qo‘zg‘atildi. Ijtimoiy himoya milliy agentligi esa keksa ayol nazoratga olinib, unga zarur yordam ko‘rsatilayotganini ma’lum qildi.

**Nogironlik nafaqasi va suv qarzini «hal qilib berish»ni va’da qilganlar ushlandi**

Samarqand, Xorazm va Sirdaryo viloyatlarida korrupsiyaga oid bir nechta holatlar fosh etildi. Bu haqda Bosh prokuratura huzuridagi departament xabar qildi.

Samarqand va Xorazmda ikki nafar shifokor fuqarolarni nogironlik nafaqasiga chiqarib berishni va’da qilib pul olganlikda gumonlanmoqda. Ularga nisbatan firibgarlik va pora berish bilan bog‘liq moddalar asosida jinoyat ishlari qo‘zg‘atilgan.

Sirdaryo viloyatida esa "Sirdaryo suv ta’minoti"ning tuman filiali boshlig‘i va xodimi ichimlik suvidan qarzdorlikni pul evaziga o‘chirib berishni va’da qilgan vaqtida qo‘lga olindi. Ushbu holat yuzasidan pora olish moddasi bilan jinoyat ishi qo‘zg‘atilib, tergov harakatlari olib borilmoqda.