Migratsiya agentligining mas’uliyatsizligi yoki lavozimparastlik: kanadalik o‘zbek nimadan norozi?

Migratsiya agentligining mas’uliyatsizligi yoki lavozimparastlik: kanadalik o‘zbek nimadan norozi?

Vashingtonda Kun.uz nashriga intervyu bergan kanadalik o‘zbek, Konservativ partiya kengashi a’zosi Obidxon Mamadaliyev Migratsiya agentligidan noroziligini bildirdi. Uning so‘zlariga ko‘ra, O‘zbekiston bilan mehnat aloqalarini yaxshilashga hissa qo‘shish maqsadida agentlikning faxriy vakili bo‘lish tashabbusi bilan chiqib, tegishli hujjatlarni topshirgan. Biroq, agentlik Behzod Musayev nomiga tuzilgan shartnomani yuborganidan so‘ng, u bilan aloqani to‘xtatgan. Mamadaliyev suhbat davomida Kanada migratsion tashkilotlari bu holatdan kulayotganini ta’kidladi.

Janubiy Alberta Texnologiya instituti laboratoriyasining texnik xodimi Obidxon Mamadaliyev Kun.uz’ga ma’lum qilishicha, u yil boshida agentlik tomonidan e’lon qilingan migratsiya bo‘yicha maxsus vakil lavozimiga qiziqib qolgan. Mamadaliyev ushbu jamoatchilik asosida ishlaydigan lavozimni egallash uchun hujjatlarini yuborgan va Migratsiya agentligining kadrlar bo‘limi boshlig‘i Olim Qodirov hamda Kamoliddin ismli shaxslar bilan muloqotda bo‘lgan. Ular hujjatlarni qabul qilib, tashabbusni ijobiy baholaganlar.

Agentlik rahbari Behzod Musayev ham bu jarayondan xabardor bo‘lgan va Mamadaliyevga javob berishdan avval suhbatga taklif qilingan. Unga suhbatdan muvaffaqiyatli o‘tgani va keyingi qadamlarni tashlash imkoniyati borligi xabar qilingan. Keyinchalik, Musayevning ismi tushirilgan shartnoma pochta orqali yuborilgan, ammo Mamadaliyevning aytishicha, shu bilan aloqa uzilgan. Ya’ni, bir necha oylik harakatlardan so‘ng, shartnomani imzolash bosqichida agentlik vakillari muloqotni to‘xtatganlar.

Kun.uz’ga murojaat qilgan Kanada fuqarosi, o‘zbekistonlik Mamadaliyevning so‘zlariga ko‘ra, faxriy vakil bo‘lishdan maqsadi O‘zbekiston bilan mehnat munosabatlariga ijobiy tus berish, shuningdek, hozirda Kanadada bo‘lgan va kelgusida keladigan mehnat muhojirlariga har tomonlama yordam berish edi. Lavozim jamoatchilik asosida bo‘lib, hech qanday moddiy manfaat ko‘zlanmagan. Biroq, u agentlik vakillari bunday tashabbusga ham yengil va mas’uliyatsizlik bilan qaraganini ta’kidladi.

“Kanadaga hatto Nepaldan ishchilar keladi. O‘zbekiston esa Ottavaning mehnat muhojirlari qabul qilinuvchi xavfsiz davlatlar ro‘yxatida ham yo‘q. 2026 yilgi mavsum tugadi, tayyor tekin ishlayman degan insonni ham qabul qilishmadi”, dedi Obidxon Mamadaliyev.

Mamadaliyevning qo‘shimcha qilishicha, u bilan Olim va Kamoliddin ismli agentlik xodimlari aloqada bo‘lgan. Muloqot to‘xtaganidan so‘ng, Obidxon pochta va ijtimoiy tarmoqlar orqali agentlik bilan bog‘lanishga harakat qilgan. Ammo, uning aytishicha, avval lavozim bo‘yicha tasdiq xatlari, kerakli ma’lumotlar va shartnoma kelib turgan pochta manzillari endi Mamadaliyev uchun yopilgan.

“Pochta orqali xatlar jo‘natsam, sizdan bu manzilga yozish imkonsiz, degan yozuv chiqadi. Ular meni bloklab qo‘yibdi, Olim esa meni tanimasligini aytdi, bu qanday layoqatsizlik”, dedi Mamadaliyev.

Hozirda Kanada immigratsiya vazirligi hamda migratsiya bo‘yicha tashkilotlari bu tashabbusdan xabardor, ammo jarayon to‘xtab qolgan-qolmagani bo‘yicha rasmiy doirada hech qanday ma’lumot yo‘q.

“Kanada immigratsion organlaridan chiqib mendan so‘rashyapti, hech nima aniq bo‘lmagach ustimdan kulishyapti”, dedi hamyurtimiz.

Ushbu materialda kimnidir oq, kimnidir qora qilib ko‘rsatish maqsad qilinmagan, o‘zbek hamyurtimiz uning tashabbuslari javobsiz qoldirilganidan noroziligini bayon etmoqda.

Kun.uz ushbu holat yuzasidan agentlikdan munosabat so‘ragan, ammo tashkilot o‘z qarashini hali ma’lum qilmagan.