Messi faoliyatini yakunlagach, “Inter Mayami” rahbariga aylanadimi?
Messi faoliyatini yakunlagach, "Inter Mayami" rahbariyatida muhim o‘rin egallashi mumkinmi?
AQSHning "Inter Mayami" klubi biznes operatsiyalari prezidenti Xavyer Asensining so‘zlariga ko‘ra, jamoa hujumchisi va sardori Lionel Messi futbolchilik faoliyatini tugatgandan so‘ng klubda muhim lavozimni egallashi mumkin.
Asensi shunday dedi: "Messi futbol o‘ynamaydigan vaqt ham keladi. Bu haqda gapirish qiyin, ammo bu aniq: u yana 15 yil davomida futbol o‘ynay olmaydi. Leoning futbolchilik faoliyatidan keyingi davr haqida o‘ylamaslik beparvolik bo‘lardi. Ammo u o‘ynashni xohlar ekan, maydonga tushishda davom etsin. Faoliyatini qachon yakunlashni o‘zi hal qilish huquqiga boshqalardan ko‘ra ko‘proq u loyiq".
Uning fikricha, Messiga "Inter Mayami" rahbariyatida muhim vazifa topshirilishi mumkin: "G‘oya shundan iboratki, Messi futbolchilik faoliyatini yakunlaganidan keyin ham o‘zini 'Inter'ga bag‘ishlash imkoniyatiga ega bo‘ladi. Hozirda MLS qoidalari bunga yo‘l qo‘ymagani sababli u klubning hammuallifi bo‘la olmaydi. Biroq futbol o‘ynashni to‘xtatishi bilan darhol jamoaning aksiyadorlaridan biriga aylanadi".
Eslatib o‘tamiz, Messi Argentina terma jamoasi bilan birgalikda AQSH, Meksika va Kanada maydonlarida bo‘lib o‘tgan Jahon chempionatida kumush medalni qo‘lga kiritdi. Jamoa hal qiluvchi final bahsida Ispaniyaga 0:1 hisobida imkoniyatni boy berdi.
Messi "Inter Mayami" safida 2023-yilning yozidan buyon to‘p surib kelmoqda. Futbolchining amaldagi shartnomasi 2028-yil yakunigacha amal qiladi. Messi "Inter Mayami" tarixidagi eng yaxshi to‘purar va assistent hisoblanadi, uning hisobida barcha turnirlardagi 94 ta o‘yinda kiritilgan 82 ta gol va 44 ta golli uzatma bor. Amerikadagi faoliyati davomida futbolchi Shimoliy Amerika Ligasi Kubogi (2023), MLS muntazam chempionati (2024), MLS Sharqiy konferensiyasi pley-off bosqichi (2025) va MLS (2025) g‘olibiga aylandi.
Messi 2003-yildan 2021-yilgacha "Barselona"da o‘ynagan. Uning tarkibida hujumchi 10 marta Ispaniya chempioni bo‘lgan, 8 marta Ispaniya Superkubogini, 7 marta mamlakat Kubogini qo‘lga kiritgan, 4 marta Chempionlar Ligasida, 3 martadan UEFA Superkubogi va klublar o‘rtasidagi Jahon chempionatida g‘olib chiqqan. Unga urilgan gollar, golli uzatmalar va o‘tkazilgan o‘yinlar soni bo‘yicha klub rekordlari tegishli.
Messi Argentina terma jamoasi tarixidagi eng yaxshi to‘purar hisoblanadi, u milliy jamoa bilan birga Jahon chempioni (2022), Finalissima g‘olibi (2022), Amerika Kubogi (2021, 2024), Olimpiada o‘yinlari (2008) va yoshlar o‘rtasidagi Jahon chempionati (2005) g‘olibiga aylangan.
Argentinalik futbolchi rekord darajadagi 8 marta "Oltin to‘p" sohibi bo‘lgan. "Barselona"dan ketganidan so‘ng u Fransiyaning "PSJ" klubi sharafini himoya qilgan. Hujumchi tarixdagi eng ko‘p titulga ega futbolchi hisoblanadi (48 ta sovrin).