Makgregor 2027-yilda Maks Xolloueyga qarshi jang qilishi mumkin

Konor Makgregor 2027-yilda Maks Xollouey bilan jang qilishi mumkin

Ikki vazn toifasida sobiq UFC chempioni Konor Makgregor kelajakdagi rejalari haqida ma’lum qildi va Maks Xolloueydan yaqinda qabul qilib olingan mag‘lubiyat uchun revansh olish niyatida ekanligini bildirdi. Uning so‘zlariga ko‘ra, bu irlandiyalik jangchining UFC’dagi so‘nggi jangi bo‘ladi.

Makgregor o‘zining Instagram sahifasida 2027-yilgi UFC Xalqaro jang haftaligiga (IFW) ishora qilib, quyidagi xabarni qoldirdi:

“Avlodlarning eng zo‘r jangi bo‘lishi kerak bo‘lgan to‘qnashuv endi qaytadan tashkil qilinadi. IFW 2027. So‘nggi raqs”.

Agar ushbu jang rasman tasdiqlansa, bu Makgregor va Xollouey o‘rtasidagi uchinchi to‘qnashuv bo‘ladi.

Joriy yilning 11-iyul kuni Las-Vegasda (Nevada shtati) bo‘lib o‘tgan UFC 329 turnirida 34 yoshli Xollouey (28-9) 69 soniya ichida texnik nokaut evaziga g‘alaba qozongan edi. Bunga uchrashuv debyutidayoq Makgregorning (22-7) o‘ng tizzasidan jiddiy jarohat olgani sabab bo‘lgandi. Ikkala jangchining ilk to‘qnashuvi esa 2013-yilning avgust oyida bo‘lib o‘tgan bo‘lib, o‘shanda Konor hakamlarning qarori bilan zafar quchgan.

Garchi irlandiyalik jangchi yaqinda oyoq mashqlarini bajarayotgani aks etgan videoni ijtimoiy tarmoqlarga joylagan bo‘lsa-da, UFC prezidenti Dana Uayt uning ahvoli haqida to‘xtalib: “Konor Makgregor kamida bir yilga safdan chiqdi”, deya ta’kidlagan.

11-iyul kungi uchrashuv Makgregor uchun so‘nggi besh yildagi ilk jang bo‘ldi. Bungacha u UFC 264 turnirida Dastin Poryega texnik nokaut bilan yutqazgandi. Ma’lumot uchun, Konor o‘zining so‘nggi uchta jangida ketma-ket, oxirgi beshta uchrashuvning esa to‘rttasida mag‘lubiyatga uchragan.

Maks Xollouey esa joriy yilning mart oyida o‘tkazilgan UFC 326 turnirida Charlz Oliveyraga hakamlar qaroriga ko‘ra imkoniyatni boy bergan bo‘lsa-da, Makgregorni mag‘lub etib, yana g‘alabalar seriyasini boshladi.