La Manshda qayiq yonib ketdi, 150 dan ortiq kishi qutqarib olindi
La-Mansh bo‘g‘ozida yong‘in chiqqan qayiqdan 150 dan ortiq kishi qutqarildi
La-Mansh bo‘g‘ozi orqali Buyuk Britaniyaga yo‘l olgan 150 dan ziyod muhojir bo‘lgan qayiqda yong‘in sodir bo‘ldi. Ushbu baxtsiz hodisadan barcha yo‘lovchilar qutqarib olindi. Bu haqda Al Jazeera xabar berdi.
4-avgust kuni ertalab Fransiyaning Bulon-sur-Mer porti yaqinida keng ko‘lamli qutqaruv operatsiyasi boshlandi. Fransiya va Buyuk Britaniya rasmiylari qayiqdagi shaxslarni evakuatsiya qildi. Ayrim muhojirlar yong‘indan qochish maqsadida o‘zlarini dengizga tashlagan.
Fransiya Mahalliy dengiz prefekturasining ma’lumotiga ko‘ra, qayiqdagi 157 kishidan besh nafari tunda yordam so‘ragan va evakuatsiya qilingan. Qolgan yo‘lovchilar yordamdan voz kechib, Buyuk Britaniya tomon harakatni davom ettirgan. Biroq, motor yonib ketgach, ularning barchasi qutqarib olindi.
**Buyuk Britaniyadagi migratsiya inqirozi**
Endi Bernem Buyuk Britaniya bosh vaziri lavozimiga tayinlanganidan ikki hafta o‘tib, 2000 dan ortiq odam kichik qayiqlar bilan La-Mansh bo‘g‘ozini kesib o‘tdi. Immigratsiya Buyuk Britaniyada qizg‘in munozaralarga sabab bo‘layotgan nozik masaladir. Shu sababli Bernem odamlarning kichik qayiqlar bilan mamlakatga kelishini to‘xtatish uchun "shafqatsiz" choralar ko‘rishga va’da bergan.
Amaldagi qoidalarga ko‘ra, boshpana so‘rash uchun shaxs Buyuk Britaniya hududida bo‘lishi shart. Xorijdan turib ariza topshirishga ruxsat berilmaydi. Amnesty International xalqaro tashkilotining ta’kidlashicha, bu qoida xorijdagilar uchun Buyuk Britaniyadan boshpana so‘rashni "imkonsiz" qilib qo‘yadi.
Buyuk Britaniya ham a’zo bo‘lgan BMTning 1951-yildagi Qochqinlar konvensiyasi ta’qibdan qochayotgan odamlarni himoya qiladi. Shuningdek, hujjat xavfsizlik izlayotganlarning noqonuniy yo‘llardan foydalanishga majbur bo‘lishini tan oladi.
Reform UK partiyasi yetakchisi Nayjel Faraj X ijtimoiy tarmog‘ida ushbu hodisaga munosabat bildirdi.
"Biz buning oldini olishimiz kerak. Rejamiz odamlar hayotini saqlab qoladi", deb yozdi u.
Farajning partiyasi 2029-yilda bo‘lib o‘tadigan navbatdagi saylovlarda g‘alaba qozonsa, muhojirlarga beriladigan muddatsiz huquqni bekor qilishga va’da bermoqda. Bu huquq odamlarga Buyuk Britaniyada cheklovsiz yashash va ishlash imkonini beradi. Shuningdek, partiya ilgari berilgan barcha shunday huquqlarni ham bekor qilishini ma’lum qilgan.
Avvalroq Gayanada 133 kishini olib ketayotgan parom cho‘kib ketgandi.