AQSH viza muddati tugagan migrantlarni aeroportda qo‘lga olmoqda

AQSH aeroportlarda viza muddati tugagan muhojirlarni, shu jumladan, amerikalik fuqarolar bilan turmush qurgan shaxslarni hibsga olishni boshladi. Bu haqda The New York Times xabar berdi.

So‘nggi haftalarda fuqarolik kiyimidagi immigratsiya agentlari kamida 15 ta aeroportda reydlar o‘tkazib, ro‘yxatdan o‘tish va uchib kelish joylarida odamlarni qo‘lga olgan. Ba’zi hibsga olishlar e’tibordan chetda qolgan bo‘lsa, boshqalari yo‘lovchilar tomonidan videoga olingan.

Immigratsiya xodimlari migrantlarni aviakompaniyalar AQSH Transport xavfsizligi boshqarmasiga taqdim etadigan ma’lumotlar asosida ushlamoqda. Hibsga olinganlar orasida immigratsiya maqomini o‘zgartirish yoki yashash guvohnomasini olish uchun hujjat topshirgan shaxslar ham bor. Ularning ayrimlari AQSH fuqarolari bilan turmush qurgan va ishlash ruxsatnomasiga ega bo‘lgan. Trampdan oldingi ma’muriyat davrida bunday shaxslar deportatsiya uchun ustuvor toifaga kiritilmagan va kamdan-kam hollarda qo‘lga olingan.

Amaldagi ma’muriyat ommaviy deportatsiya kampaniyasini boshlagach, bu siyosat tubdan o‘zgardi. Endilikda viza muddati tugab, mamlakatda qolayotgan barcha shaxslar noqonuniy muhojir sifatida ko‘rilmoqda.

Yangi taktika doirasida aeroportlarda qancha odam qo‘lga olingani yoki qancha vaqt ushlab turilgani haqida rasmiy ma’lumot berilmagan. Hibsga olishlar Oq uyning Immigratsiya va bojxona xizmati (ICE)dan butun mamlakat bo‘ylab reydlarni kuchaytirishni talab qilayotgan bir paytda amalga oshirilmoqda. Ma’muriyat kuniga 2 ming nafar muhojirni qo‘lga olishni maqsad qilgan.

**"O‘zini deportatsiya qilish" yo‘li**

AQSHda buni amalga oshirmoqchi bo‘lgan noqonuniy migrantlar CBP One ilovasi orqali deportatsiyani tashkillashtiradi. Ularning vataniga qaytgani tasdiqlangach, 1 000 dollar taqdim etiladi.

Hozirda noqonuniy muhojirni hibsga olish, ushlash va chiqarib yuborishning o‘rtacha qiymati AQSH uchun 17 ming dollarni tashkil etadi. Shu sababli "o‘zini deportatsiya qilish" dasturi ishga tushgan, u muqobil va hamyonbop variant hisoblanadi.

AQSHdan mustaqil deportatsiya qilishni istaydiganlar hibsga olinmaydi. Bundan tashqari, ular kelajakda Qo‘shma Shtatlarga qonuniy asosda kirish imkoniyatini saqlab qoladi. Tegishli tashabbus prezident Donald Tramp tomonidan ilgari surilgan. 2025-yilgi ma’lumotga ko‘ra, AQSHda noqonuniy bo‘lgan 1,6 million kishi o‘z ixtiyori bilan mamlakatni tark etgan, yana 500 ming kishi majburan deportatsiya qilingan.