JCh vaqtida klublar futbolida ro‘y bergan top-transferlar

Jahon chempionati davrida klublar futbolidagi eng yirik transferlar

Jahon chempionati davom etayotganiga qaramay, Yevropa klublari faoliyatini to‘xtatmadi va yangi mavsumga tayyorgarlik doirasida o‘z tarkiblarini kuchaytirishga kirishdi.

**Elliot Anderson**

* **Qayerdan:** «Nottinghem Forest»

* **Qayerga:** «Manchester Siti»

* **Yoshi:** 23

* **Ampluasi:** markaziy yarimhimoyachi

* **Fuqaroligi:** Angliya

* **Narxi (Transfermarkt):** 135 million yevro

«Manchester Siti» maydon markazi uchun muntazam ravishda futbolchilar sotib oladi, ammo barcha transferlar ham muvaffaqiyatli bo‘lavermaydi. O‘tgan yozda «shaharliklar» Tidjani Reynders va Niko Gonsalesga katta mablag‘ sarflagan edi, undan oldinroq tajribali Mateo Kovachich xarid qilingan, ammo ularning hech biri kutilgan darajani namoyish eta olmadi. Endi «Siti» o‘tgan mavsum APLning eng yaxshi yarimhimoyachilaridan biri bo‘lgan va jahon chempionatida ham o‘zini ko‘rsatgan Elliot Andersonni o‘z safiga qo‘shib oldi. U jamoani tark etishi kutilayotgan Rodrining o‘rnini egallaydi. Bu bilan klub tarkibini jiddiy darajada kuchaytirdi, ammo futbolchini qo‘lga kiritish uning bozor narxidan ikki barobar ko‘proq mablag‘ sarflashni talab qildi.

**Sandro Tonali**

* **Qayerdan:** «Nyukasl»

* **Qayerga:** «Tottenhem»

* **Yoshi:** 26

* **Ampluasi:** markaziy yarimhimoyachi

* **Fuqaroligi:** Italiya

* **Narxi:** 108 million yevro

Nomdor klublarda Tonalining xizmatlariga anchadan buyon talab mavjud edi va bu yozda ham uning nomi ko‘plab klublar, jumladan, APL chempioni «Arsenal» va uchinchi o‘rin sohibi «MYu» bilan bog‘lanayotgandi. Ammo amalda futbolchi «qarg‘alar» safidan o‘tgan mavsumni 17-o‘rinda yakunlagan «Tottenhem»ga o‘tdi. «Nyukasl» Tonalini og‘ir kunlarida qo‘llagandi va endi uning transferi uchun katta pul ishlab oldi, futbolchining o‘zi esa o‘z mahalladoshi Roberto De Dzerbi qo‘li ostida qayta qurish davriga kirgan «shporlar»da o‘z omadini sinab ko‘radi.

**Mateus Fernandes**

* **Qayerdan:** «Vest Hem»

* **Qayerga:** «Tottenhem»

* **Yoshi:** 22

* **Ampluasi:** markaziy yarimhimoyachi

* **Fuqaroligi:** Braziliya

* **Narxi:** 99 million yevro

Mantiqan tushuntirish qiyin bo‘lgan yana bir transfer. «Tottenhem» yana bir futbolchiga kosmik summa to‘ladi. «Vest Hem» chempionshipga tushib ketganiga qaramay, Fernandes yaxshi mavsum o‘tkazgandi: unga «Manchester Yunayted», «Real» va yana bir qator grandlar qiziqish bildirayotgandi. Ammo 22 yoshli portugaliyalik kutilmaganda «Tottenhem»ni tanladi – bunga u o‘zi yashab turgan shaharni o‘zgartirishni istamagani ham sabab bo‘lishi mumkin. Endi u londonliklar klubining yangi loyihasidagi muhim futbolchilardan biri bo‘ladi. Uning salohiyati juda katta, ammo u buni Shimoliy London klubida qanchalik yuzaga chiqara olishini vaqt ko‘rsatadi.

**Joan Manzambi**

* **Qayerdan:** «Frayburg»

* **Qayerga:** «Aston Villa»

* **Yoshi:** 20

* **Ampluasi:** hujumkor yarimhimoyachi

* **Fuqaroligi:** Shveytsariya

* **Narxi:** 60 million yevro

U o‘tgan mavsum oxirida Yevropa ligasida ko‘rsatgan o‘yinlaridan keyin tilga tushgandi, jahon chempionatida esa haqiqiy yulduzga aylandi. Manzambi – bir vaqtning o‘zida bir qancha pozitsiyalarni yopa oladigan universal askar, texnikasi ajoyib, kuchli va aniq zarbaga ega, qolaversa, juda yosh – atigi 20 da. Bunday ko‘rsatkichlarga ega bo‘lgan futbolchi top-klublar uchun haqiqiy topilma, ammo bu mavsum qator yetakchilari bilan xayrlashgan «Aston Villa» barchadan ildamroq harakat qildi. Bu Joanning o‘zi uchun ham to‘g‘ri tanlov bo‘lishi mumkin – birminghemliklar klubida unda o‘yin amaliyoti ko‘proq bo‘ladi, bir necha mavsumdan keyin esa istalgan grand safiga borib qo‘shilishi mumkin.

**Marko Palestra**

* **Qayerdan:** «Atalanta»

* **Qayerga:** «Chelsi»

* **Yoshi:** 21

* **Ampluasi:** o‘ng qanot himoyachisi

* **Fuqaroligi:** Italiya

* **Narxi:** 57 million yevro

Palestrani hozircha asosan Italiyada tanishadi, ammo yangi mavsumda u o‘ziga bo‘lgan munosabatni o‘zgartirishi mumkin. Marko 21 yoshda va u A Seriyaning o‘tgan mavsumida kashfiyotga aylandi va «Atalanta»ning eng yaxshi futbolchilaridan biri bo‘ldi. Himoyaning o‘ng qanotida harakatlanuvchi ushbu futbolchining istiqboli yorqin ko‘rinmoqda, London klubida u asosiy tarkib uchun Malo Gyustoga raqobat ko‘rsatadi, bu esa Habi Alonsoga Ris Jyeymsni o‘zini yaxshiroq his qiladigan tayanch zonasida o‘ynatishga imkon beradi. Palestra uchun avvaliga «Inter» asosiy da’vogar edi, ammo inglizlar klubi futbolchini ilib ketgach, italyanlar klubi rahbari Beppe Marotta agentlardan shikoyat qilib, ular transferlar bozoriga katta ta’sir ko‘rsata boshlaganini aytdi.

**Andrey Santos**

* **Qayerdan:** «Chelsi»

* **Qayerga:** «Manchester Yunayted»

* **Yoshi:** 22

* **Ampluasi:** markaziy yarimhimoyachi

* **Fuqaroligi:** Braziliya

* **Narxi:** 56,3 million yevro

«Chelsi» va «MYu» muntazam ravishda bir-biriga futbolchi sotadi. Bu safar Andrey Santosning navbati keldi. Braziliyalik ushbu yarimhimoyachini londonliklar katta umidlar bilan Fransiya chempionatidan olib kelishgandi, ammo u Kaysedo va Enso Fernandes bilan raqobatda asosiy tarkibga kira olmadi. Manchesterda esa unda yetarlicha o‘yin amaliyoti bo‘lishi aniq – Andreyni Kazemironing o‘rniga olishdi. Bu futbolchilar o‘z xususiyatlari bo‘yicha bir-biridan biroz farqlanadi, ammo yosh futbolchining ishlari «Old Trafford»da yurishib ketishi ham mumkin. Ammo muvaffaqiyatsizlikni ham istisno etib bo‘lmaydi – «MYu» va «Chelsi» o‘rtasidagi transferlarda bunaqasi muntazam ravishda ro‘y berib turadi.

**Mark Kukurelya**

* **Qayerdan:** «Chelsi»

* **Qayerga:** «Real»

* **Yoshi:** 28

* **Ampluasi:** chap qanot himoyachisi

* **Fuqaroligi:** Ispaniya

* **Narxi:** 55 million yevro

Mart oyida Kukurelya «Real»ga o‘tgandan ko‘ra (u – «Barselona» tarbiyalanuvchisi) jingalak sochlarini olib tashlashni ma’qul ko‘rishini aytgandi, ammo bir necha oy o‘tib Madrid klubi futbolchisiga aylandi. «Chelsi» vataniga qaytishni istayotgan ispaniyalik futbolchisini olib qolish uchun ortiqcha o‘jarlik qilmadi (qolaversa, uning o‘rniga yosh Hato o‘ynashi mumkin). Madriddagilar esa bozor narxidagi yaxshi futbolchi bilan anchadan buyon muammoli bo‘lib kelgan nuqtani yopishga muvaffaq bo‘ldi.

**Luka Vushkovich**

* **Qayerdan:** «Tottenhem»

* **Qayerga:** «Brayton»

* **Yoshi:** 19

* **Ampluasi:** markaziy himoyachi

* **Fuqaroligi:** Xorvatiya

* **Narxi:** 54 million yevro

«Shporlar» bu safargi transferlar bozorida aqldan ozgandek harakat qilmoqda – jamoa allaqachon yangi futbolchilar uchun 267 million yevro sarflab yubordi. Shu jumladan, «Brayton»dan 60 million yevro evaziga niderlandiyalik Pol van Hekke olindi. O‘z navbatida, shunga yaqin summa evaziga Luka Vushkovich qarama-qarshi yo‘nalishda harakatlandi. 19 yoshli xorvat o‘tgan mavsumni ijara asosida «Hamburg»da o‘tkazgandi va o‘zini yaxshi tomonlardan namoyish eta oldi va Xorvatiya terma jamoasiga ham jalb etildi. «Brayton»da u yetarlicha o‘yin amaliyotiga va bejiz Yevropaning eng istiqbolli markaziy himoyachilaridan biri sifatida qaralmayotganini isbotlash imkoniga ega bo‘ladi.

**Ismoil Saybari**

* **Qayerdan:** PSV

* **Qayerga:** «Bavariya»

* **Yoshi:** 25

* **Ampluasi:** hujumkor yarimhimoyachi/hujumchi

* **Fuqaroligi:** Marokash

* **Narxi:** 50 million yevro

25 yoshli marokashlik hujumchi anchadan buyon grand klublar nazariga tushgandi – u Niderlandiya chempionatining o‘tgan mavsumida PSV safida gol+pas bo‘yicha 19+9 ko‘rsatkichini qayd etdi. Jahon chempionati esa Saybari katta klublarda o‘ynashga tayyor ekanini ko‘rsatdi. Lekin «Bavariya» uni asosiy tarkib futbolchisi sifatida o‘ynatishi dargumon – katta ehtimol bilan, Ismoil Keynning o‘rinbosari bo‘ladi. Undagi universallik ham o‘z so‘zini aytishi mumkin – futbolchi hujumning chap qanotida ham, hujumchi ortida ham harakat qila oladi. Nima bo‘lganda ham, «Bavariya» tarkibni sifatli futbolchi bilan to‘ldirdi, bu esa uzoq davom etadigan mavsum oldidan juda muhimdir.

**Nataniel Braun**

* **Qayerdan:** «Ayntraxt»

* **Qayerga:** «Bavariya»

* **Yoshi:** 23

* **Ampluasi:** chap qanot himoyachisi

* **Fuqaroligi:** Germaniya

* **Narxi:** 50 million yevro

Myunxenliklarda yana bir muhim transfer. Braun so‘nggi ikki mavsumda ancha o‘sdi va Germaniyaning eng yaxshi chap qanot himoyachilaridan biri sifatida nom qozondi. Uning kuzirlari – tezlik, to‘p bilan yaxshi muomila qilish va hujumlarga yaxshi qo‘shilish. Chap qanotda Nataniel so‘nggi vaqtlarda jarohatlarga moyil bo‘lib qolgan Alfonso Devis bilan raqobatlashishi kerak bo‘ladi. «Ayntraxt» esa yana bir marta Yevropa uchun eng yaxshi yosh iste’dodlar inkubatori maqomini mustahkamladi.

**Rasmus Hoylund**

* **Qayerdan:** «Manchester Yunayted»

* **Qayerga:** «Napoli»

* **Yoshi:** 23

* **Ampluasi:** markaziy hujumchi

* **Fuqaroligi:** Daniya

* **Narxi:** 44 million yevro

Daniyalik hujumchi o‘tgan mavsumni ijara asosida Neapolda o‘tkazgandi, shunday ekan, bu transfer quruq rasmiyatchilikka aylandi. «Napoli» «MYu» bilan kelishuvdagi tegishli bandni ishga tushirdi va endi Hoylund rivojlanishda davom etishiga umid qiladi. Rasmus A Seriyaning o‘tgan mavsumida tezkorligi va texnikasi bilan klub raqiblari uchun muammoga aylandi. Ammo u hozircha sermahsulligi bilan maqtana olmaydi. Nima bo‘lganda ham, bu Lukakuni hamon asosiy hujumchi sifatida o‘ynatib yurgan «Napoli» uchun yaxshi transfer bo‘ldi.

**Yuri Tilemans**

* **Qayerdan:** «Aston Villa»

* **Qayerga:** «Manchester Yunayted»

* **Yoshi:** 29

* **Ampluasi:** markaziy yarimhimoyachi

* **Fuqaroligi:** Belgiya

* **Narxi:** 41 million yevro

«Yunayted» yarimhimoya chizig‘ini kuchaytirish ustida ishlamoqda va Tilemans bu chiziqda muhim figuraga aylanishi mumkin. «Qizil iblislar» belgiyalik futbolchining shartnomasida ko‘rsatilgan 41 million yevrolik tovon pulini to‘ladi va uni o‘ziniki qildi. Buni deyarli riski yo‘q transfer deyish mumkin – Yuri 29 yoshda, unda yuqori saviya va APLdagi muvaffaqiyatli ishtirok etish tajribasi mavjud, tayanch yarimhimoyasida yaxshi sherik bilan u liganing o‘z pozitsiyasidagi eng yaxshi futbolchilaridan biriga aylanishi mumkin.

**Viktor Munios**

* **Qayerdan:** «Osasuna»

* **Qayerga:** «Liverpul»

* **Yoshi:** 23

* **Ampluasi:** vinger

* **Fuqaroligi:** Ispaniya

* **Narxi:** 40 million yevro

Viktorning taqdiri noodatiy kechdi – u Kataloniyada tug‘ilgan va o‘z vaqtida ko‘k-anorranglilar akademiyasida tahsil olgan, ammo 18 yoshida «Real»ga ko‘chib o‘tgan. Mish-mishlarga ko‘ra, «Osasuna»da o‘tgan muvaffaqiyatli mavsumdan keyin (u bu klubda ijara asosida o‘ynagan), Ispaniyaning har ikki grandi ham uni o‘z safida ko‘rishni xohlagan, ammo yakunda madridliklar «Liverpul» tomonidan taklif etilgan 40 million yevroni qabul qilgan, «Barsa» esa shunchaki raqobat qila olmagan. Hozircha Munios yangi klubida zaxira futbolchisi bo‘lishi kutilmoqda, ammo u hali 23 yoshda va kelgusida kuchli ijrochi bo‘lib yetishishi mumkin.

**Morten Yulmann**

* **Qayerdan:** «Sporting»

* **Qayerga:** «Atletiko»

* **Yoshi:** 27

* **Ampluasi:** tayanch yarimhimoyachisi

* **Fuqaroligi:** Daniya

* **Narxi:** 40 million yevro

Konor Gellaher «Atletiko» safida o‘z o‘rnini topolmadi va Angliyaga qaytdi, shunday ekan, «matraschilar» maydon markazi uchun yangi futbolchiga ehtiyoj sezdi. Pablo Barrios jarohat olganidan keyin jamoa markazi juda kuchsizlashib ketdi va endi klub bu zonani yopishga harakat qilmoqda. Yulmann so‘nggi yillarda Portugaliyada to‘p surdi, ammo endi yangi bosqichga chiqish vaqti kelgandi. 27 yoshli futbolchi ajoyib zarbaga ega, maydonda ko‘p mehnat qiluvchi va raqib hujumlari yo‘nalishlarini oldindan o‘qiy oladigan sifatli tayanch yarimhimoyachisi hisoblanadi. U madridliklar klubining boshlang‘ich tarkibini kuchaytirishi tayin.

**Meyson Grinvud**

* **Qayerdan:** «Marsel»

* **Qayerga:** «Fenerbahche»

* **Yoshi:** 24

* **Ampluasi:** vinger

* **Fuqaroligi:** Angliya

* **Narxi:** 39 million yevro

Grinvud faoliyatini «MYu»da ajoyib boshlagandi, ammo ketma-ket mojarolar uning karerasiga jiddiy zarar yetkazdi. Fransiyada ingliz futbolchisi liganing eng yaxshi vingerlaridan edi – to‘purarlar poygasida g‘oliblik uchun kurashdi, ko‘plab golli uzatmalar muallifiga aylandi va qaysidir grand klub e’tiboriga tushishi mumkin edi. Ammo imiji tufayli katta klublar uni chaqirishmadi va faoliyatini Turkiyada davom ettiradigan bo‘ldi.

**Alexandro Grimaldo**

* **Qayerdan:** «Bayyer»

* **Qayerga:** «Atletiko»

* **Yoshi:** 30

* **Ampluasi:** chap qanot himoyachisi

* **Fuqaroligi:** Ispaniya

* **Narxi:** 22 million yevro

Yevropaning eng sermahsul laterallaridan biri faoliyatida yangi bosqichga o‘tdi. Grimaldo 30 yoshgacha «Benfika» va «Bayyer» kabi klublarda qolib ketdi. Endi esa unda kuchliroq klubda o‘zini ko‘rsatish imkoniyati mavjud. O‘z navbatida, «Atletiko» ham yuqori saviyali chap qanot himoyachisiga ehtiyoj sezayotgandi, shu tariqa, Grimaldo vataniga qaytdi. Madridda tajribali futbolchilarni yoqtirishadi va Alexandro 30 yoshda ekaniga qaramay, yaqin yillar ichida jamoaning asosiy futbolchilaridan biri bo‘lishiga shubha yo‘q.

**Denzel Dyumfris**

* **Qayerdan:** «Inter»

* **Qayerga:** «Real»

* **Yoshi:** 30

* **Ampluasi:** o‘ng qanot himoyachisi

* **Fuqaroligi:** Niderlandiya

* **Narxi:** 20 million yevro

Dumfrisning «Inter» bilan shartnomasi muddati tugashiga bir yil qolgandi, shuning uchun boshqa klublarda yuqori saviyali futbolchini arzon narxga qo‘lga kiritish imkoniyati bor edi. Bir yil oldin uning nomini «Barselona» bilan bog‘lashgandi, ammo kataloniyaliklar boshqa transferlar bilan bandligida «Real» ildamlik qildi. Madridliklar Dani Karvahal ketganidan keyin o‘ng qanot himoyasida yuzaga kelgan bo‘shliqni boshqa bir tajribali futbolchi bilan to‘ldirdi. Endi Dyumfris Trent bilan asosiy tarkib uchun raqobatlashishi kerak bo‘ladi, Joze Mourinio esa qanotda rotatsiya uchun ajoyib tanlovga ega bo‘ldi.

**Leandro Trossar**

* **Qayerdan:** «Arsenal»

* **Qayerga:** «Beshiktosh»

* **Yoshi:** 31

* **Ampluasi:** vinger /hujumkor yarimhimoyachi

* **Fuqaroligi:** Belgiya

* **Narxi:** 18 million yevro

Trossar «Arsenal» bilan chempionlikni qo‘lga kiritganidan keyin jahon chempionatini ham juda kuchli o‘tkazdi. Ammo uning Londondan ketishi allaqachon hal bo‘lgan masala edi. U o‘tgan yozda «Arsenal»ning yangi shartnomasini rad etgandi va klubda shartnoma muddati tugayotgan futbolchisini vaqtida sotishdan boshqa chora qolmadi. Leandro hujum chizig‘ida bir qancha pozitsiyalarni yopa oladi. U 31 yoshda, ammo yana bir necha yil davomida yuqori darajada futbol o‘ynay oladi.

**Robert Levandovski**

* **Qayerdan:** «Barselona»

* **Qayerga:** «Chikago»

* **Yoshi:** 37

* **Ampluasi:** markaziy hujumchi

* **Fuqaroligi:** Polsha

* **Narxi:** erkin agent

Buyog‘iga – erkin agent maqomida boshqa klubga o‘tgan futbolchilar haqida. Xulian Alvares transferiga harakat qilayotgan («Atletiko» esa asosiy futbolchisini raqobatchisiga sotishni istamayapti) «Barsa» Robert Levandovski bilan shartnomani uzaytirmadi. Polshalik hujumchi 37 yoshda ekaniga qaramay, yaxshi sport formasida, ammo Flik jamoasining tezkor tempiga doim ham ulgura olmayapti. U endi AQShda bir necha yil xotirjam to‘p surishi mumkin.

**Antuan Grizmann**

* **Qayerdan:** «Atletiko»

* **Qayerga:** «Orlando»

* **Yoshi:** 35

* **Ampluasi:** hujumkor yarimhimoyachi/hujumchi

* **Fuqaroligi:** Fransiya

* **Narxi:** erkin agent

Grizmann ham Ispaniyadan MLS chempionatiga yo‘l oldi. Antuan o‘tgan yozdayoq darajasi pastroq chempionatga ketishi haqida xabarlar chiqqandi, ammo u «Atletiko»da yana bir kuchli mavsum o‘tkazib, «gol plyus pas» tizimida 22 ochko to‘pladi. Grizmann mavsum davomida Madriddan baribir ketishi haqida ma’lum bo‘lgandi, ammo u Yevropada hech bo‘lmaganda yana bir mavsum to‘p surishiga bo‘lgan umidlar ham yo‘q emasdi. Ammo bu ro‘y bermadi va Yevropani yana bir afsona tark etdi.

**Bernardu Silva**

* **Qayerdan:** «Manchester Siti»

* **Qayerga:** «Real»

* **Yoshi:** 31

* **Ampluasi:** markaziy yarimhimoyachi/vinger

* **Fuqaroligi:** Portugaliya

* **Narxi:** erkin agent

Silva jahon chempionatini kuchsiz o‘tkazdi, ammo u hamon yuqori saviyali futbolchi bo‘lib qolayotganiga shubha yo‘q. Bernarduning APLdagi karerasi yakuniga yetdi, ammo 31 yoshda u faoliyatida yangi sahifani ochdi. Portugaliyalik yarimhimoyachi uchun asosiy da’vogar «Barselona» bo‘lib turgandi, ammo kutilmaganda «Real» oraga qo‘shildi va yaxshiroq moliyaviy takliflar bilan raqobatda yutib chiqdi. Natijada futbolchi yana bir necha yil o‘z vatandoshi Joze Mourinio bilan birga ishlaydigan bo‘ldi. Lekin hozircha Joze Silvadan qanday foydalanishi tushunarsiz.

**Ibraima Konate**

* **Qayerdan:** «Liverpul»

* **Qayerga:** «Real»

* **Yoshi:** 27

* **Ampluasi:** markaziy himoyachi

* **Fuqaroligi:** Fransiya

* **Narxi:** erkin agent

«Real» so‘nggi yillarda erkin agentlarni qo‘lga kiritishni odat qilgan – Alaba, Ryudiger, Mbappe, Trent va endi Bernardu va Konate. Ibraima Madridga ko‘chib o‘tmoqchi ekani haqidagi gaplar bir yildan buyon aylanib yurgandi. Yakunda «Liverpul» bilan shartnomani uzaytirishdan bosh tortdi va bu yozda kutilganidek «Real» tarkibiga kelib qo‘shildi. Konate o‘tgan mavsumda «Liverpul»da tez-tez xatolarga yo‘l qo‘ygandi, endi esa «Real»ning asosiy tarkibi uchun kurashadi.