Iyul oyida iste’mol tovarlari va xizmatlar narxi pasayishi kuzatildi

Iyul oyida iste’mol tovarlari va xizmatlar narxlarida pasayish kuzatildi.

O‘zbekistonda iyul oyida 0,1 foizlik deflyatsiya qayd etildi. Milliy statistika qo‘mitasining ma’lumotlariga ko‘ra, 2026-yilning iyul oyida iste’mol sektoridagi tovarlar va xizmatlar narxlari o‘rtacha 0,1 foizga arzonlashgan.

Yillik iste’mol narxlari indeksi (INI) 106,4 % ni tashkil etib, o‘tgan yilning shu oyiga (2025-yil iyul — 108,9 %) nisbatan 2,5 foiz bandga pasaygan.

Iyul oyida oziq-ovqat mahsulotlari narxlari o‘rtacha 0,91 % ga pasaygan bo‘lsa, nooziq-ovqat tovarlari 0,3 % ga, aholiga ko‘rsatiladigan pullik xizmatlar esa 0,5 % ga qimmatlashgani kuzatilgan.

Inflyatsiyaga ta’sir ko‘rsatgan asosiy oziq-ovqat mahsulotlari orasida sabzi (12,6 %), uzun boshoqli guruch (6,4 %), yumaloq boshoqli guruch (6,1 %), mosh (4,2 %) va piyoz (1,7 %) narxlarining oshishi qayd etilgan.

Inflyatsiyani pasaytiruvchi omil sifatida esa baqlajon (-42,8 %), bulg‘or qalampiri (-39,4 %), pomidor (-24,0 %), tarvuz (-20,3 %), kartoshka (-18,0 %), qovun (-14,5 %), shaftoli (-10,6 %), bodring (-10,6 %), sarimsoq (-10,0 %), nok (-7,1 %), uzum (-6,6 %), olma (-6,6 %), banan (-6,6 %) va tuxum (-5,0 %) narxlarining pasayishi muhim hissa qo‘shgan.

Nooziq-ovqat mahsulotlari narxlaridan AI-98 va AI-100 markali benzin (10,0 %), AI-95 markali benzin (8,5 %), AI-92 markali benzin (3,9 %) narxlarining oshishi kuzatilgan.

Shuningdek, xizmatlar narxi va tariflarida maishiy chiqindi uchun haq to‘lash (2,7 %), mobil aloqa xizmatlari (2,4 %), shahar avtobusida yo‘l haqi (1,4 %) narxlarining oshishi asosiy omil bo‘lib xizmat qilgan.

Hisob-kitoblar uchun 10 mingdan ortiq savdo va xizmat ko‘rsatish nuqtalaridan 2 milliondan ortiq narxlar qayd etilgan. Jami 419 turdagi oziq-ovqat va nooziq-ovqat mahsulotlari hamda 98 turdagi xizmatlar narxlari kuzatilgan.