Goyal Hindiston va Oʻzbekiston oʻrtasidagi savdo aylanmasini ikki baravar oshirishga chaqirdi

Goyal Hindiston va Oʻzbekiston oʻrtasidagi savdo hajmini ikki baravar oshirishga chaqirdi

Toshkent, Oʻzbekiston (UzDaily.uz) — 3-avgust kuni Nyu-Dehlida Oʻzbekiston-Hindiston biznes-forumi boʻlib oʻtdi. Unda Oʻzbekiston Respublikasi investitsiyalar, sanoat va savdo vaziri Laziz Qudratov, Hindiston Savdo va sanoat vaziri Piyush Goyal, Hindiston Savdo-sanoat palatalari federatsiyasi (FICCI) va Invest India agentligi rahbarlari, shuningdek, ikki mamlakatning 100 dan ortiq ishbilarmon doiralari va yetakchi kompaniyalari vakillari ishtirok etdi.

Forum davlat va biznes kun tartibini oʻzida mujassam etdi. Ishtirokchilar savdo-iqtisodiy hamkorlikning hozirgi holatini muhokama qilib, uni rivojlantirishning asosiy zaxiralarini belgiladilar hamda kelgusidagi hamkorlikning ustuvor yoʻnalishlarini aniqladilar.

Taʼkidlanganidek, Oʻzbekiston va Hindiston xalqlari oʻrtasidagi koʻp asrlik doʻstlik bugungi kunda strategik sheriklik va oʻzaro ishonchga tayanadi. Ikki davlat rahbarlari belgilab bergan yoʻl tufayli ikki tomonlama munosabatlar savdo, investitsiya va sanoat kooperatsiyasi tashabbuslari bilan izchil boyib bormoqda.

Forumning asosiy mavzularidan biri oʻzaro savdo boʻldi. Oʻtgan yil yakunlariga koʻra, tovar ayirboshlash hajmi 30 foizga oshib, ilk bor 1,3 milliard AQSh dollaridan oshdi. Tomonlar bozorlarga kirish imkoniyatlarini kengaytirish, tartib-taomillarni soddalashtirish va maʼmuriy toʻsiqlarni qisqartirish orqali ushbu koʻrsatkichni 2 milliard AQSh dollariga yetkazishni maqsad qilgan. Shu maqsadda Savdoga koʻmaklashish boʻyicha Anglashuv memorandumi tayyorlanmoqda.

Ikki mamlakat iqtisodiyotlarining oʻzaro bir-birini toʻldiruvchi xususiyati alohida qayd etildi. Oʻzbekiston qishloq xoʻjaligi va oziq-ovqat mahsulotlari, oʻgʻitlar, kimyo mahsulotlari, rangli metallar, toʻqimachilik, elektrotexnika mahsulotlari hamda boshqa sanoat mahsulotlari eksportini kengaytirishga tayyor. Hindistondan esa farmatsevtika mahsulotlari, texnologiyalar, mashina va uskunalar hamda avtomobil butlovchi qismlari importini oshirish imkoniyatlari mavjud.

Investitsiya kun tartibi ham alohida koʻrib chiqildi. Bugungi kunda Oʻzbekistonda Hindiston kapitali ishtirokidagi qariyb 400 ta korxona faoliyat yuritmoqda, qoʻshma loyihalar portfeli esa 5 milliard AQSh dollaridan oshadi. Hindiston biznesi bozorni oʻrganish bosqichidan amaliy investitsiyalar bosqichiga oʻtayotgani qayd etildi.

Ustuvor yoʻnalishlar sifatida metallurgiya va konchilik sanoati, kimyo, energetika va raqamli infratuzilma, farmatsevtika va sogʻliqni saqlash, mashinasozlik hamda agrosanoat majmuasi belgilandi. Asosiy eʼtibor xomashyoni chuqur qayta ishlash, mahalliylashtirish, yuqori qoʻshilgan qiymatga ega mahsulotlar ishlab chiqarish, qayta tiklanuvchi energetika va maʼlumotlarni qayta ishlash markazlarini rivojlantirish, shuningdek, zamonaviy tibbiyot va agrosanoat obyektlarini barpo etishga qaratildi.

Ishtirokchilarga Oʻzbekistonning ishlab chiqarish va eksport maydoni sifatidagi afzalliklari taqdim etildi. Korxonalarni mamlakatda mahalliylashtirish investorlarga jadal rivojlanayotgan ichki bozor hamda boshqa mintaqalarga eksport qilish uchun keng imkoniyatlar yaratishi taʼkidlandi.

B2B va G2B uchrashuvlari davomida kompaniyalar va davlat idoralari vakillari aniq takliflar, hamkorlik shakllari, moliyalashtirish mexanizmlari hamda keyingi qadamlarni muhokama qildilar. Oʻzbekiston Respublikasi Investitsiyalar, sanoat va savdo vazirligi istiqbolli loyihalarni maydon tanlash va moliyalashtirishni shakllantirishdan tortib, obyektlarni ishga tushirishgacha boʻlgan barcha bosqichlarda har tomonlama qoʻllab-quvvatlashga tayyor ekanini tasdiqladi.

Oʻtkazilgan muzokaralar oʻzaro manfaatli hamkorlikning yangi yoʻnalishlarini belgilash hamda amaliy kun tartibini shakllantirish imkonini berdi. Endilikdagi ustuvor vazifa eng puxta ishlab chiqilgan takliflarni qisqa muddatda aniq investitsiya loyihalariga aylantirishdan iborat.