Dembele “Al-Hilol” taklifini rad etdi

Dembele "Al-Hilol"ning taklifini rad etdi

Fransiya terma jamoasi va "PSJ" klubining hujumchisi Usmon Dembele Saudiya Arabistonining "Al-Hilol" jamoasidan tushgan taklifni qabul qilmadi. Bu haqda jurnalist Sasha Tavolyeri o‘zining ijtimoiy tarmoqlardagi sahifasida ma’lum qildi.

Manbaning xabar berishicha, "Oltin to‘p" sohibi saudiyaliklarga Parijda qolish niyatida ekanligini va klub bilan shartnomasini uzaytirishni istayotganini bildirgan. Qayd etish joizki, 29 yoshli futbolchining "PSJ" bilan amaldagi shartnomasi 2028-yilning 30-iyuniga qadar amal qiladi.

Ma’lumotlarga ko‘ra, 2025/2026-yilgi mavsumda Dembele barcha musobaqalarda jami 40 ta o‘yinda maydonga tushib, 20 ta gol urgan va 11 ta golli uzatmaga mualliflik qilgan.

Shuningdek, hujumchi Fransiya terma jamoasi tarkibida JCH—2026 da ham faol ishtirok etgan. Ushbu mundialda fransuzlar to‘rtinchi o‘rinni egallagan bo‘lsa, Dembele 8 ta uchrashuvda maydonga tushib, 6 ta gol va 2 ta assist qayd etishga muvaffaq bo‘lgan.