AQSHda neft zaxiralari 1983-yildan beri eng quyi darajaga tushdi

AQSHda neft zaxiralari 1983-yildan buyon eng past darajaga tushib ketdi.

AQSH federal agentligi bo‘lgan Hukumat hisobdorligi idorasi auditorlari mamlakatning strategik neft zaxirasi yangi inqirozlarni yengish uchun cheklangan imkoniyatlarga ega ekanligi haqida xulosa berdi. Bu haqda Briefs Finance nashri xabar berdi.

AQSH Federal byudjet nazorati boshqarmasining may oyidagi hisobotiga ko‘ra, Energetika vazirligi vakillari zaxiraning eskirgan quvurlar, omborlar va rezervuarlar tarmog‘ini "yamab-yasqab qo‘yilgan" deb ta’riflab, uning qancha muddat xizmat qilishi noma’lumligini ta’kidlagan.

"Strategik neft zaxirasining resurslarni olish, taqsimlash va to‘ldirish imkoniyatlari hozirda cheklangan. Eskirgan infratuzilma bilan bog‘liq ko‘p yillik muammolar hamda ularni bartaraf etishga qaratilgan keng ko‘lamli qurilish ishlari sababli bu imkoniyatlar kelajakda xavf ostida qolishi mumkin", deya ogohlantirgan AQSH Federal byudjet nazorati boshqarmasi o‘z hisobotida.

Mart oyida Eron Hormuz bo‘g‘ozi orqali yuk tashishni to‘sib qo‘yganidan so‘ng, AQSH prezidenti Donald Tramp strategik neft zaxirasidan 172 million barrel neft olishni buyurgan. Energetika vazirligi ma’lumotlariga ko‘ra, o‘tgan hafta davomida federal zaxiralar 3,7 million barrelga kamayib, ularning umumiy hajmi qariyb 308 million barrelni tashkil etdi. Bu 1983-yil martidan beri qayd etilgan eng past ko‘rsatkich hisoblanadi.

Boshqarma ma’lumotlariga ko‘ra, zaxiraning 25 foizdan ortig‘i "qurilish ishlari to‘xtatilgani va yerosti omborlari yopilgani sababli" qazib olish uchun yaroqsiz holga kelgan. Rapidan Energy’ning iyul oyidagi hisobotida aytilishicha, hozirgi vaqtda kamida 103 million barrel neftni olishning imkoni yo‘q.

Iyun oyida Reuters nashri AQSH Ukraina va Erondagi urush ortidan dunyodagi eng yirik neft eksportchisiga aylanganini xabar qilgandi. Bu voqea o‘n yilliklar davomida Saudiya Arabistoni va Rossiya yetakchilik qilib kelgan tartibni o‘zgartirib yuborgan.