AQSh Senati Rossiyaga qarshi «do‘zaxiy» deb atalgan sanksiyalarni ma’qulladi
Hujjat Senat tomonidan tasdiqlangach, Vakillar palatasiga yuboriladi. Sanksiyalar Rossiya nefti va gazining eng yirik xaridorlariga 100 foizgacha tariflar joriy etishni ko‘zda tutadi.
AQSh Senati Rossiyaga qarshi "do‘zaxiy" sanksiyalarni tasdiqladi
Reuters agentligining xabar berishicha, Amerika Qo‘shma Shtatlari Senati Rossiya va Eronga nisbatan sanksiyalarni kuchaytirishga qaratilgan qonun loyihasini ma’qulladi. Ushbu hujjat Senat tomonidan tasdiqlangach, Vakillar palatasiga yuboriladi.
Senatorlar marhum Lindsi Grem nomi bilan ataluvchi ushbu loyihani 68 ovoz bilan qo‘llab-quvvatladilar, 9 nafar senator esa unga qarshi chiqdi. Gremning o‘zi bu hujjatni "do‘zaxiy sanksiyalar to‘g‘risidagi qonun loyihasi" deb ta’riflagan edi.
Mazkur qonun loyihasi AQSh prezidentiga Rossiya nefti yoki gazining eng yirik xaridorlari bo‘lgan beshta davlatdan import qilinadigan tovarlarga nisbatan maqsadli bojlar joriy etish imkonini beradi. Shuningdek, u Eronning energetika va qurol-yarog‘ sektorlarini moliyalashtirishni cheklovchi sanksiyaviy vakolatlarning amal qilishini to‘xtatib qo‘yishning oldini olishga qaratilgan bandni ham o‘z ichiga oladi.
"Rossiya va Eronga qarshi sanksiyalar joriy etish to‘g‘risidagi Lindsi Grem nomli 2026-yilgi qonun" deb nomlangan hujjatning yangi versiyasiga ko‘ra, uchinchi davlatlarga nisbatan boj 100 foizgacha bo‘lishi mumkin. Iyul oxiridagi protseduraviy ovoz berish vaqtida Xitoy, Hindiston, Slovakiya, Vengriya va Ozarbayjon Rossiya neftining, Xitoy, Fransiya, Yaponiya, Vengriya va Belgiya esa Rossiya gazining eng yirik xaridorlari qatoriga kiritilgandi. Sanksiyalar hammuallifi, senator Richard Blyumental asosiy nishonlar sifatida Xitoy va Hindistonni ko‘rsatgan.
Tariflardan tashqari, qonun loyihasi Rossiyaning jismoniy va yuridik shaxslariga qarshi sanksiyalarni qonunchilik darajasida mustahkamlaydi.
Prezident Kongressni xabardor qilgan holda milliy xavfsizlik manfaatlari nuqtai nazaridan sanksiyalar amal qilishini to‘xtatib turish huquqini saqlab qoladi. Ularni to‘liq bekor qilish faqat tinchlik kelishuvi imzolanganidan hamda Rossiya va Ukraina o‘rtasidagi jangovar harakatlar to‘xtatilganidan keyingina mumkin bo‘ladi.