7 avgustdan O‘zbekistonda hayvonlarni ro‘yxatdan o‘tkazish boshlanadi

7-avgustdan boshlab O‘zbekistonda uy va qishloq xo‘jaligi hayvonlarini majburiy ro‘yxatdan o‘tkazish jarayoni yo‘lga qo‘yiladi. Bu jarayon veterinariya pasportini rasmiylashtirish va hayvonlarni davlat hisobiga olish orqali amalga oshiriladi.

Veterinariya pasporti hayvonning identifikatsiya raqami, egasining maʼlumotlari, shuningdek, o‘tkazilgan emlashlar va davolashlar haqidagi maʼlumotlarni o‘z ichiga oluvchi rasmiy hujjat hisoblanadi.

Qoidalarga ko‘ra, hayvon egalari yirik shoxli qoramol, qo‘y, echki va tuyalarni tug‘ilganidan keyin 14 kun ichida, cho‘chqalarni 30 kun ichida, otlarni to‘rt oylik yoshga yetgunga qadar, it va mushuklarni esa uch oylik yoshga yetgunga qadar ro‘yxatdan o‘tkazishlari shart.

Veterinariya pasportini olish uchun hayvon egasi ariza va shaxsni tasdiqlovchi hujjat bilan tuman yoki shahar veterinariya bo‘limiga murojaat qilishi lozim. Hayvonni davlat hisobiga olish va pasportni berish uch kun ichida amalga oshiriladi.

Hozirgi qonunchilikda hayvonlarni majburiy identifikatsiya qilish va ro‘yxatdan o‘tkazish talabi mavjud.

Shu bilan birga, hayvonlarni o‘z vaqtida davlat hisobiga qo‘ymaganlik uchun javobgarlik masalasi alohida normativ-huquqiy hujjatlar bilan tartibga solinishi mumkin.