«Аллоҳ яратган ҳар бир мавжудотнинг қадри бор» — Саида Мирзиёева жониворларга шафқатсиз муносабат учун жазо кучайтирилганини эслатди
Президент администрацияси раҳбари ота-оналарни болаларда жониворларга нисбатан меҳр уйғотишга чақирди
«Аллоҳ яратган ҳар бир мавжудотнинг қадри бор» — Саида Мирзиёева жониворларга шафқатсиз муносабат учун жазо кучайтирилганини эслатди.
Президент Администрацияси раҳбари Саида Мирзиёева ота-оналарни фарзандларида жониворларга нисбатан меҳр-шафқат туйғуларини уйғотишга даъват этди. Шунингдек, у Ўзбекистонда ҳайвонларга шафқатсиз муносабатда бўлганлик учун жазо чоралари кучайтирилганини таъкидлади.
Маълум қилинишича, жорий йилнинг 28 июнидан бошлаб ҳайвонларга шафқатсиз муносабатда бўлганларга нисбатан янада қатъий жазо чораларини назарда тутувчи қонунчилик нормалари кучга кирган.
Эндиликда бундай қилмишлар учун маъмурий жарималар икки баробар оширилди. Бундан ташқари, ҳуқуқбузарларга нисбатан 15 суткагача маъмурий қамоқ жазоси қўлланилиши мумкин. Ушбу турдаги ноқонуний хатти-ҳаракатларни такрорлаган шахслар эса жиноий жавобгарликка тортилиб, озодликдан маҳрум этилиши кўзда тутилган.
Мирзиёеванинг таъкидлашича, бундай қонунлар фақат айбдорларни жазолаш учунгина қабул қилинмайди. Улар жамият қандай тартиб ва қадриятларни барча учун бирдек мажбурий деб билишини ҳам намоён этади.
Унинг фикрича, жамиятда хавфсизлик фақатгина барча зўравонликка муросасиз муносабатда бўлгандагина ҳукм суради.
«Аллоҳ яратган ҳар бир мавжудотнинг қадри бор, ҳайвонларга нисбатан шафқатсизлик учун жазонинг кучайтирилиши жамиятда шу қонуниятга бўйсунадиган соғлом муҳитни шакллантиришга хизмат қилади. Биз айнан шундай дунёда яшашни ва фарзандларимизни худди шу руҳда вояга етказишни истаймиз. Ўзгалар ҳаётига ҳурмат болаликдан бошланади. Бу борада асосий масъулият ота-оналар зиммасида. Айнан улар ожизларга озор етказиш мумкин эмаслигини, одам ўз кучини шафқатсизлик орқали намоён этиши нотўғри эканини фарзандларига ўргатадилар. Мен ота-оналарни ушбу муҳим ҳақиқатни доимо эсда тутишга чақираман», — деди Администрация раҳбари.
Саида Мирзиёева видеода Администрациянинг кичик «ходимлари» — Ялпиз ва Дархон лақабли мушукларни кўрсатиб, уларга ходимларнинг меҳри бўлакча эканини айтиб ўтди.