Зеленский «Карпат саккизлиги» тузилганини эълон қилди
Украина президенти Володимир Зеленский ҳамкорликнинг янги халқаро формати - «Карпат саккизлиги» ташкил этилганини эълон қилди.
Зеленский «Карпат саккизлиги» ташкил этилганини маълум қилди
«Биз янги С8 форматини — бизни ва Европадаги қўшниларимизни: Руминия, Сербия, Полша, Словакия, Чехия, Австрия, Венгрия ва, албатта, бутун Европа Иттифоқини бирлаштирадиган Карпат саккизлигини ишга туширмоқдамиз», деди у.
Зеленскийнинг айтишича, янги формат Карпат минтақасидаги давлатлар, ҳудудлар ва маҳаллий жамоаларни бирлаштириши лозим. С8 иштирокчилари хавфсизлик, энергетика, логистика ва трансчегаравий иқтисодиёт йўналишларида ҳамкорлик қилишни режалаштирмоқда.
«Карпат саккизлиги»нинг илк саммити 18-сентабр куни Украинанинг Ивано-Франкивск вилоятида бошланди. Унда Полша бош вазири Доналд Туск, шунингдек, Сербия ва Руминия президентлари Александр Вучич ва Никушор Дан қатнашмоқда.
Бир кун аввал Украинага ташриф буюришини билдирган Словакия бош вазири Роберт Фицо саммитга келмади.
Шунингдек, саммитда қарийб 550 нафар бизнес вакили иштирок этиши, унинг якунида эса бир миллиард евролик инвестиция ва савдо шартномалари имзоланиши кутилаётгани ҳақида Зеленский маълум қилди.