Зайнаб Садриеванинг қизи, Фармонбибининг келини — Дилбар Исмоилова 88 ёшда: актрисанинг оиласи, армонлари ва бугунги ҳаёти ҳақида
Зайнаб Садриеванинг қизи, Фармонбибининг келини — Дилбар Исмоилова 88 ёшда: актрисанинг оиласи, армонлари ва бугунги ҳаёти ҳақида
Ўзбекистон халқ артисти Дилбар Исмоилова “Менинг юртим” телеканалининг “Изларим” кўрсатувида ота-онаси — марҳум санъаткорлар Обид Ҳасанов ва Зайнаб Садриева, турмуш ўртоғи ҳамда ижодий йўли ҳақида гапириб берди. Эслатиб ўтамиз, актриса машҳур “Келинлар қўзғолони” спектаклида онаси Зайнаб Садриева билан бир саҳнада чиқиб, онасининг келини Лутфи образини гавдалантирган.
### Актриса дадаси Обид Ҳасанов ҳақида
— Дадам раҳматли, Обид Ҳасанов жуда яхши актёр бўлган. Халқ артисти эди, чолларнинг ролини жуда чиройли ижро этарди. Айниқса, “Бой ва хизматчи” спектаклида ролини чиройли ўйнаган. Кейин овозлари ҳам жуда зўр бўлган. Дадамнинг овозига ҳамма ҳавас қиларди. Кўпчилик мени онамга ўхшатади, лекин мен дадамга ўхшайман. Дадамнинг чиройли овози менга ўтган. Буни онам ҳам айтарди, дейди Дилбар Исмоилова.
### “Онам актриса бўлишимни истамаган”
— Онам санъаткор бўлишимни истамагани учун улардан жуда қаттиқ хафа бўлганман. Онам менга “мактабни олтин медалга битиргансан. Чет тиллар олийгоҳига ёки ТашГУ (ҳозирги Ўзбекистон Миллий университети) нинг журналистика йўналишига ўқишга киргин. Санъат йўналишида нима қиласан?”, дерди. Ўшанда онамга “ўзингиз ҳам санъаткорсиз-ку, касбингиздан норозимисиз?”, деб сўраганман. Улар “йўқ, ундай эмас, қизим, қийналиб қолишинг мумкин”, деган. Шунда онамга “сиз қийналмадингиз, мен ҳам қийналмайман. Олтин медални қайтариб олишса олаверсин, имтиҳон топшириб ўқишга кираман”, деганман.
Онам бир сўзли аёл эди. Барибир “йўқ, санъат йўналишидан кетмайсан кетмайсан. Бошқа хоҳлаган йўналишингда ўқиб, битта стол эгаси бўласан. Санъатнинг нони қаттиқ бўлади. Биргина қийинчиликка енгилсанг, қолганига ҳам чидолмайсан”, дерди. Онамга буни ўзим ҳал қилишимни айтиб, дипломимни олиб “театралний” институтига кетганман, дейди ёшлик йилларини хотирлаган актриса.
### “Турмуш қурганимдан сўнг фамилиямни мажбуран ўзгартирганман”
— Турмуш ўртоғим Арсен Файзуллаевич билан олти йил учрашиб, сўнг оила қурганман. Ўшанда онам турмуш ўртоғимга бошидан ўз йўналишимда ишлашим кераклиги ҳақида айтган “ҳаётнинг аччиқ-чучугини билсин, эртага болали бўлса, уй-бола билан ўралашиб қолади. Шунинг учун ҳали унинг ишлай олиш-олмаслигини кўришим керак”, деган.
Турмушга чиққунимга қадар театрда 10 йил Дилбар Ҳасанова бўлиб юрганман. Оилали бўлганимдан кейин баъзилар “ҳали ҳам Ҳасанова бўлиб юрибсан. Бунинг жаримаси катта бўлса керак, фамилиянгни турмуш ўртоғингнинг фамилиясига ўзгартир”, деган. Мен эса ўзимча, барибир ўзимнинг фамилиямда қоламан, деб юраверганман.
Ҳамза театрида мени ҳамма Ҳасанова деб танирди. Сўнг бирданига катта-катта саҳна асарларида Исмоилова фамилияси билан чиқа бошладим. Бир куни театрга “Дилбар Ҳасановани йўқотиб қўйдик. Бу актриса театрдан кетдими?”, деб келишган. Менинг олдимда шундай дейишганида, уларга турмушга чиққаним сабабли фамилиям ўзгарганини тушунтирганман, дейди у.
### “Онам ъСен Зайнаб Садриеванинг қизисан. Мендан ўрнак олъ, дерди”
— Онам саҳнада ҳеч нима бўлмагандай юрса ҳам, баъзида уйга келганидан кейин йиғлаб оларди. Сабаби, юрагида алами бўларди. Орқаваротдан ўзи ҳақида “биз ўзбек бўлиб ўйнамаган ролларни у татар бўла туриб ижро қилиб юрибди”, деган гапларни эшитган. Бу гаплар, албатта, онамнинг нафсониятига теккан.
Шунинг учун менга ҳам “Дилбар, иқтидорли актрисасан, катта ролларни ҳам меъёрига етказиб ижро этяпсан. Томошабин сени тан оляпти. Газета ва журналларда номинг чиқиб турибди. Элга яқин бўлганинг сари бу ёқда рашк пайдо бўлади. Ўзингнинг ҳамкасбларинг орқангдан пичоқ уриши мумкин. Менга жуда кўп марта орқамдан пичоқ уришган. Ҳеч қачон хафа бўлганингни бировга кўрсатма. Агар сумкангда бир сўминг бўлса ҳам, 100 сўм пулим бор, деб айт. Ҳаммаси яхши, дегин. Ҳеч қачон ҳеч кимга паст кетма. Ҳар доим ғурурли бўлгин”, дерди. “Сен Зайнаб Садриеванинг қизисан”, дея онасининг сўзларини эслайди актриса.
### Онасининг вафоти ҳақида
— Онамни охирги манзилга кузатганимизга 35 йил бўлибди. Худди ҳаммаси кеча бўлгандай, ҳеч эсимдан чиқмайди. Тошкент кўчалари бўйлаб қабристонга кетар эканмиз, назаримда, бутун шаҳар оёққа турганга ўхшарди. Кетиб борар эканмиз, ўтган-кетган худди сезгандек онам билан хайрлашгандай бўлган. Кета-кетгунча йиғидан бўшамаганман. Онамни йўқотишимга чидолмасам керак, деб ўйлардим. Инсон кўникувчан бўларкан, кўникдим. Аммо шу вақтга қадар бир дақиқага ҳам уларни унутганим йўқ.
Онам вафотининг охирги кунлари “Дилбар, яна бир марта ъКелинлар қўзғолониъда рол ўйнасам дегандим. Иложи бўлмади, энди буни шогирдларимга топшираман”, дедилар. Ҳамма нарсага чидаш мумкин-у, онани йўқотишдан оғири бўлмас экан. Аям ўтган бўлсалар ҳам хотиралари тирик, ҳамон мухлисларининг орасида юрибдилар. Уларнинг мухлислари қачон мени кўришса, “Зайнаб опанинг қизи”, деб айтишади.
### “Охирги йилларда катта спектаклларда рол ўйнолмаяпман”
— Сўнгги вақтларда анча қариб қолдим, тез-тез катта спектаклларда ўйнолмаяпман. Менга мос роллар бўлиб турибди. Назаримда, энди илгаригидек ролларни ижро этолмасам керак, дейди у.
### “Саҳна—менинг ҳаётим”
— 70 йиллик умрим саҳнада ўтди. Бундан афсусланмайман. Касбимни яхши кўраман, театр, саҳна — менинг ҳаётим. Ўйнаган ролларим қанча бўлмасин, булар менинг ҳаётим, уларга жонимни, ҳаётимни, соғлиғимни бердим. Неча марта соғлиғим ёмонлашиб, саҳнада йиқилганимда, судраб олиб чиқиб кетишган пайтларим бўлди. Сидқидилдан ишладим ва ҳеч ҳам бунинг учун ачинмайман. Қилган меҳнатимни хамир учидан патир, деб ҳисоблайман. Лекин афсуски, ёшим етиб қолди. Менга қўйиб беришса, юзга кирганда ҳам саҳнада рол ўйнашни хоҳлайман. Лекин ҳаёт барибир ўзиникини кўрсатади, дейди театр ва дубляж актрисаси Дилбар Исмоилова.