Юрак нуқсони туфайли аборт қилишдан бош тортган суррогат она васийлик бўйича курашни АҚШ Олий судига олиб чиқди
У абортлар тақиқланган Техасга қочиб кетди ва энди тўрт ҳафталик чақалоқнинг васийлигини талаб қилмоқда.
Юрак нуқсони туфайли аборт қилишдан бош тортган суррогат она васийлик бўйича баҳсни АҚШ Олий судига олиб чиқди
Суррогат она Маккенна Вест эр-хотиннинг хоҳишига қарши равишда болани дунёга келтиргач, унинг васийлигини олишга ҳаракат қилмоқда.
Ўзини ёллаган ота-онанинг ҳомиладорликни тўхтатиш ҳақидаги илтимосларини рад этган суррогат она АҚШ Олий судидан чақалоққа ким васийлик қилиши кераклиги борасидаги низога аралашишни сўради.
Маккенна Вест Калифорниялик эр-хотин Омар Аҳмед ва Наушин Гилкарга ота-оналик ҳуқуқини берган аввалги қарор ижросини вақтинча тўхтатиб туришни сўраб, судга шошилинч апелляция аризаси топширди.
Аҳмед ва Гилкар 20-ҳафтадаги УТТ (УЗИ) текшируви ҳомилада оғир юрак нуқсони борлигини кўрсатганидан кейин Вестдан ҳомиладорликни тўхтатишни сўрашган эди.
Бунинг ўрнига, бир нечта республикачи расмийлар томонидан қўллаб-қувватланган Вест деярли барча абортлар тақиқланган Техас штатига бориб, болани дунёга келтирди.
Ўшандан бери Вест ўтган ой чап қоринча гипоплазияси синдроми — юракнинг чап томони танага етарли миқдорда қон ҳайдай олмайдиган нуқсон билан туғилган чақалоқнинг васийлигини олишга ҳаракат қилмоқда.
АҚШ Касалликларни назорат қилиш ва олдини олиш марказлари маълумотларига кўра, бу ҳолат кўпинча бир нечта жарроҳлик амалиётини талаб қилади ва улар орқали тўлиқ даволанмайди. Бундай нуқсон билан туғилган чақалоқлар умрбод асоратларга дуч келишлари мумкин.
Вест ушбу штатга борганидан сўнг, Техас штатининг республикачи бош прокурори Кен Пакстон ишга аралашиб, боланинг ушбу штатда тиббий ёрдам олишини талаб қилувчи шошилинч суд қарорини қўлга киритди. Чақалоқ туғилганидан кўп ўтмай жарроҳлик амалиётини бошдан кечирди.
Олий судга топширилган аризада Вест даволаш имкониятлари ҳақида билиб олгач ва «бу қимматбаҳо чақалоқни» сақлаб қолишни истагани учун эр-хотиннинг аборт қилиш ҳақидаги илтимосларини рад этганини айтган.
Вестнинг таъкидлашича, биологик ота-она болага васийлик қилмаслиги керак, чунки улар ҳаёт учун хавфли нуқсон ҳақида билганларидан кейин болани аборт қилмоқчи бўлганликлари сабабли, ўғил болага керакли тиббий ёрдамни кўрсатмасликларидан қўрқади.
Associated Press агентлигининг хабар беришича, аввалги суд мажлисида Гилкар улар Руми деб исм қўйган чақалоқ «бизнинг фарзандимиз» ва «ҳаётимиз мазмуни» эканини айтган. Уларнинг сўзларига кўра, Вест уларга хабар бермасдан Техасга кетган ва уларнинг тиббий маълумотларни олиш имкониятини чеклаб қўйган.
Калифорния суди аввалроқ Аҳмед ва Гилкарга ота-оналик ҳуқуқини берган эди, Техас суди эса Вестнинг болага яқинлашишини тақиқловчи ажрим чиқарди.
Ўтган ой Калифорниялик эр-хотиннинг адвокати боланинг аҳволи оғир эканини ва унда «эҳтимолий асоратлар кузатилаётганини» айтди.
Вестнинг таъкидлашича, Олий суд аралашувисиз у боланинг соғлиғи тўғрисидаги маълумотларни олиш имкониятидан маҳрум бўлади. Аризада Вестнинг адвокатлари Калифорниялик эр-хотин болани хосписга (паллиатив ёрдам марказига) жойлаштириши мумкинлигини тахмин қилишган.