Чақалоқлар ўлимидан сўнг Покистонда соғлиқни сақлаш тизимидаги энг катта амалдор ишдан олинди

Покистонда 26-август куни эрталаб шифохонанинг туғруқ бўлимида юз берган ёнғин оқибатида камида 14 нафар янги туғилган чақалоқ ҳалок бўлганидан сўнг, мамлакат соғлиқни сақлаш тизимидаги энг юқори лавозимли амалдор ишдан бўшатилди.

Расмийларнинг маълумотларига кўра, ёнғин кондиционер блокида бошланган. Палатадаги чақалоқлар эса ё инкубаторларда бўлган, ёки кислород ускуналарига уланган бўлган. Ушбу фожиа Исломободдаги давлат касалхонасининг хавфсизлик чоралари бўйича бир қанча саволларни келтириб чиқармоқда.

Қурбонлардан бирининг отаси, исмини ошкор этмасдан, Реутерс агентлигига палатанинг аҳволи ёмонлигини билдирган: "Мен саккиз кундан бери у ерга қатнаётгандим. У бинода ёнғин хавфсизлиги таъминланмаган, тегишли чиқиш йўллари ҳам йўқ эди. Барча эшиклар ёпиқ эди, болаларимизни кўришимиз учун фақат битта эшик очиб қўйилган. Улар болаларимизни жуда тез-тез кўришга келамиз, деб хавотирланиб, бошқа эшикларни қулфлаб қўйишган эди".

Касалхонанинг ижрочи директори эса ББС нашрига туғруқ бўлимининг эшиги қулфланмаганини, бироқ чақалоқларни ўғирлаб кетиш эҳтимолидан ҳимоя қилиш учун унга қўриқчи қўйилганини билдирди.

Касалхонадаги тартибсиз ва даҳшатли манзараларни тасвирлаган баъзи гувоҳлар қутқарувчиларнинг жавоб ҳаракатлари секин бўлганидан шикоят қилишмоқда. Улардан бири Хуррам Маҳмуд АФП ахборот агентлигига ёнғинда уч кунлик қизидан айрилганини айтди ва қутқарувчиларнинг етиб келиши учун соатлар кетганини таъкидлади: "Биз йўл бўйида ёрдам кутиб ўтирган эдик".

Яна бир гувоҳ эса ёнғин "жуда тез" тарқалиб кетганини айтди. У беморларни қутқаришга ёрдам бериш мақсадида касалхонага киргани, бироқ туғруқ бўлимига етиб бора олмаганини таъкидлади: "Ичкарини қалин қора тутун қоплаган ва беморлар қамалда қолган эди... қутқарув гуруҳлари қарийб икки соатдан кейин етиб келди".