Йиллик тўлов 270 млн сўмгача: айрим олийгоҳлар супер-контракт нархларини эълон қилди

Йиллик тўлов 270 млн сўмгача: айрим олийгоҳлар супер-контракт нархларини маълум қилди

Ўзбекистондаги бир қатор олий таълим муассасалари янги ўқув йили учун белгиланган супер-контракт суммаларини эълон қилди. Айрим университетларда йиллик тўлов 22 миллион сўм атрофида бўлса, бошқаларида у 200 млн сўмдан ҳам ошган.

Ҳозирча университетлар орасида энг юқори супер-контракт Тошкент давлат юридик университетида қайд этилди. Олийгоҳ эълон қилган нархлар жорий йилги кириш имтиҳонларида минималдан юқори балл тўплаган, бироқ баҳолари тўлов-контракт чегарасига камида 4,05 балл етмаган абитуриентлар учун мўлжалланган. Жумладан, бакалавриатнинг кундузги таълим шакли учун супер-контракт қарийб 269 млн 960 минг сўмни ташкил этади. Уч йиллик кечки таълим учун йиллик супер-контракт 132,1 млн сўм, кундузги магистратура учун 122 млн сўм, кечки магистратура учун эса 97,6 млн сўм этиб белгиланган.

Наманган давлат университети ҳам янгиланган табақалаштирилган тўлов — супер-контракт миқдорларини эълон қилди. Кундузги таълимда энг паст нарх 26,9 млн сўм, энг юқори сумма эса 122,6 млн сўм қилиб белгиланган. Даволаш иши, педиатрия ёки олий ҳамширалик иши йўналишларида ўқиш 114,1 млн сўм туради. Университетда кечки ёки масофавий йўналишда супер-контракт асосида таҳсил олиш 31,4 млн сўмдан бошланиб, 128,5 млн сўмгача етади.

Тошкент ахборот технологиялари университети эса контракт балига етмаган 4 баллик оралиқ учун табақалаштирилган нархларни белгилаган. Масалан, кундузги бакалавриатда контракт балига 1,05 балл етмаганлар супер-контракт учун базавий тўловнинг 1,5 бараварини тўлайди — 18,1 млн сўмдан 24,7 млн сўмгача. Агар 3,06 дан 4,05 баллгача етмаган бўлса, тўлов 36,3 млн сўмдан 49,6 млн сўмгача ошади. Масофавий таълим шакли учун эса етишмаган балл ва танланган йўналишга қараб нархлар 23,1 млн сўмдан 59,4 млн сўмгача белгиланган.

Наманган давлат педагогика институтида энг кам супер-контракт 22,9 млн сўм, энг юқори чегара эса 31,9 млн сўмгача етади. Бу тартиб кундузги ва кечки таълим йўналишларида ўқишни истаган, тўплаган баллари тўлов-контрактга 4,05 баллдан ортиқ етмаган ҳамда 56,7 баллдан кам бўлмаган абитуриентларга тааллуқли.

Тошкент кимё-технология университети Янгиер филиалида супер-контрактлар 22,2 млн сўмдан 48,1 млн сўмгача, Наманган давлат чет тиллари институтида эса 22,9 млн сўмдан 47,2 млн сўмгача белгиланган.

Андижон давлат педагогика университетида бакалавриатнинг кундузги таълим шакли учун супер-контракт суммалари йўналишга қараб 29,6 млн сўмдан 37 млн сўмгача етади. Кечки таълим шаклидаги нарх эса 34,5 млн сўмни ташкил этади.

Андижон давлат чет тиллари институтида супер-контракт миқдори 29,6 млн сўмдан 47,2 млн сўмгача бўлади.

Ўз навбатида, Андижон давлат университети миқдорни базавий контракт суммасининг тўрт бараваридан олти бараваригача тасдиқлаган. Бироқ университет вакиллари “Дарё”га ҳали базавий миқдор тўлиқ тасдиқланмаганини билдирган. Шунга қарамай, супер-контракт миқдори камайтириб борилаётгани айтилган. Масалан, аввал базавий қиймат 10 бараваргача етган, кейин нарх 8 бараварга туширилган. Эндиликда эса максимум олти бараварни ташкил этади.

Андижон давлат педагогика институти ҳам супер-контракт миқдорини базавий контрактнинг тўрт баравардан олти бараваргача этиб белгилаган. Қолган олийгоҳлар ҳозирча нархларни эълон қилмаган.

Қонунчиликка кўра, супер-контракт асосида ўқиш истагини билдирган абитуриент биринчи ўқув йили учун камида 50 фоиз тўлов қилиши керак. Шундан сўнг у олийгоҳ ректорининг буйруғи билан ўқишга қабул қилинади. Супер-контракт асосида олийгоҳга қабул қилинган талабалар биринчи ўқув йилини муваффақиятли тугаца, кейинги ўқув йилидан бошлаб умумий белгиланган тартибда контракт тўлаб ўқишни давом эттиради.

Ҳозир Ўзбекистонда жами 215 та олий таълим муассасаси фаолият юритмоқда. Уларда таҳсил олаётган талабалар сони 1,6 миллион нафарни ташкил этади.