ЙҲТБ илк бор бир суткалик ҳаракатланиш статистикасини ошкор қилди
Тошкент ЙҲХББ илк бор бир суткалик ҳаракат статистикасини эълон қилди: 4 сентябрь куни 1,5 млн машина, 2 млн дан ортиқ йўловчи ва 22 та ЙТҲ қайд этилди.
ЙҲТБ илк бор суткалик ҳаракатланиш статистикасини эълон қилди
Тошкент Йўл ҳаракатини ташкил этиш маркази (ЙҲТБ) илк бор пойтахтдаги суткалик транспорт оқими тўғрисидаги маълумотларни эълон қилди. Марказ маълумотларига кўра, 4 сентябрь куни шаҳар кўчалари ва йўлларида 1 502 057 та транспорт воситаси ҳаракатланган. Бу ҳақда Тошкент ЙҲТБ хабар бермоқда.
3 сентябрга нисбатан транспорт воситалари сони 14 807 тага ёки тахминан 1 фоизга ошган. Бир кун аввал пойтахт йўлларида 1 487 250 та транспорт воситаси ҳаракатланган эди.
Бир сутка давомида жамоат транспорти 2 миллиондан ортиқ йўловчини ташиди. 170 та автобус йўналишида 1 670 та автобус хизмат кўрсатди ва улардан 1 228 158 нафар йўловчи фойдаланди. Тошкент метрополитени эса ўша куни 862 053 нафар йўловчига хизмат кўрсатди.
ЙҲТБ Ситуацион маркази шаҳар чорраҳаларидаги тирбандлик даражасини ҳам кузатиб борди. Тиғиз вақтларда олтита чорраҳада тирбандлик етти баллгача етди, яна бир чорраҳада эса бу кўрсаткич етти баллдан ошди.
Энг тирбанд ҳудудлардаги юкламани камайтириш мақсадида мутахассислар светофорларнинг иш режимларини ўзгартирдилар.
Айрим йўналишларда яшил чироқнинг ёниш давомийлиги узайтирилди. Бундан ташқари, ҳаракатни тартибга солиш учун муаммоли чорраҳаларга йўл-патрул хизмати ходимлари юборилди.
Бир сутка давомида Тошкентда 4 751 та Йўл ҳаракати қоидаларини бузиш ҳолати қайд этилди. Шу давр мобайнида 22 та йўл-транспорт ҳодисаси юз бериб, уларда тўрт киши оғир тан жароҳати олди.
ЙҲТБ Тошкент ва Ўзбекистон бўйича бундай кундалик транспорт ҳаракати статистикаси илгари ҳеч қачон эълон қилинмаганини таъкидлади.
Марказнинг маълум қилишича, бу каби маълумотларни эълон қилиб бориш доимий амалиётга айланади.