Европада Россияга экспорт бўйича янги тергов бошланди
Германия ва Австрияда Россияга Европа Иттифоқи санксияларини четлаб 53 та енгил автомобил ва олтита тягач етказиб берганликда гумонланаётган икки тадбиркорда тинтувлар ўтказилди. Суд уларнинг тахминан 7 миллион евролик мол-мулкини хатлашга рухсат берган.
Европада Россияга экспорт юзасидан янги тергов бошланди
ДВ хабарига кўра, Кайзерслаутерн прокуратураси бу ҳақда 29-сентабр куни маълум қилган.
Тергов версиясига кўра, гумонланувчилар 2022-йил кузидан 2024-йил охиригача Россияга 53 та енгил автомобил ва ярим тиркамаларни тортишга мўлжалланган олтита тягач экспорт қилган. Етказиб беришларни яшириш учун учинчи мамлакатлар, жумладан, Беларус, Қирғизистон ва Гуржистондан фойдаланилгани айтилмоқда.
Тинтувлар 8-сентабр куни Германиянинг Рейнланд-Пфалс еридаги Нойштадт-ан-дер-Вайнштрассе шаҳри ҳамда Австрия пойтахти Венада тадбиркорларнинг турар жойлари ва тижорат биноларида ўтказилган. Амалиётда Германия, Австрия ва Белгия ҳуқуқ-тартибот органлари иштирок этган.
Прокуратура илтимосномаси асосида Кайзерслаутерн суди гумонланувчиларнинг тахминан 7 миллион евролик мол-мулкини хатлашга рухсат берган. Бу сумма ноқонуний экспортдан олингани тахмин қилинаётган даромадга тенг.
Германиядаги тинтувларда Порсче ва Мерседес-Бенз русумли иккита автомобил, Австрияда эса 85 минг евро нақд пул олиб қўйилган. Германия, Австрия ва Белгиядаги банк ҳисобларида яна 278 минг евро блокланган.
Бундан ташқари, Нойштадтдаги тадбиркорнинг биносидан учта ов милтиғи ва ўқ-дорилар топилган. Шу сабабли унга нисбатан қурол тўғрисидаги қонунчиликни бузганлик эҳтимоли юзасидан ҳам тергов бошланган.
Прокуратурага кўра, ҳар икки гумонланувчи ҳозирча сукут сақлаш ҳуқуқидан фойдаланган. Тергов давом этмоқда.
ДВ эслатишича, март ойида Вюрсбург суди бавариялик автодилерни санксияларни бузиб, Россияга 111 та люкс тоифадаги автомобил етказиб бергани учун олти йилга озодликдан маҳрум қилган. Тергов маълумотларига кўра, бу машиналар Россия Федерал хавфсизлик хизмати, Федерал қўриқлаш хизмати, «Роснефт» компанияси ва президент маъмурияти ходимларига етказилган.
2025-йил июлида эса Гессендаги автосалон ходими Россияга санксияларни четлаб 71 та люкс автомобил сотгани учун беш йиллик қамоқ жазосига ҳукм қилинган.
2025-йил майида Германия прокурорлари қимматбаҳо автомобилларни Россияга етказиш билан боғлиқ 40 дан ортиқ ишни тергов қилаётгани хабар қилинган. Бироқ экспертлар яширин етказиб беришларнинг фақат кичик қисмига чек қўйилаётганини таъкидлаган.