ЕИдан Россияга қарши рекорд қадам: 1646 шахс ва ташкилот санксия рўйхатига киритилиши кутилмоқда
Европа Иттифоқи Россияга қарши санксия рўйхатларига яна 1646 нафар шахс ва ташкилотни қўшишни режалаштирмоқда. ДВ маълумотига кўра, бу Россиянинг Украинага қарши уруши давомида рўйхатларнинг бир йўла энг катта кенгайтирилиши бўлади.
ЕИдан Россияга қарши рекорд чораси: 1646 шахс ва ташкилот санксия рўйхатига киритилиши кутилмоқда
ЕИ давлатлари элчилари иккита янги рўйхат юзасидан келишувга эришган. Улар ташқи ишлар вазирлари томонидан 12-октабр куни Люксембургда расман тасдиқланиши кутилмоқда.
Айни пайтда Украинанинг ҳудудий яхлитлигини бузиш билан боғлиқ санксия режими доирасида қарийб уч минг шахс ва ташкилотга чеклов қўйилган. Янги қарор қабул қилинса, бу рақам бирданига ярмидан кўпроққа ошади.
Мазкур қарор Россия иқтисодиётининг алоҳида тармоқларига қўшимча чекловлар киритишни назарда тутмайди. Диққат марказида асосан муайян шахслар ва ташкилотлар турибди.
ДВънинг Европа дипломатик доираларидаги манбаларига кўра, асосий рўйхат 1569 та номдан — 743 нафар шахс ва 826 та ташкилотдан иборат. Уларнинг аксарияти Россия ҳарбий-саноат мажмуаси билан боғлиқ. Россия олигархлари орасидан янги шов-шувли исмлар киритилиши кутилмаяпти.
Реутерс маълумотига кўра, янги рўйхатга тушаётганларнинг ярмидан кўпи баллистик ракеталар, жумладан, «Искандер-М» мажмуаларини ишлаб чиқаришда иштирок этади.
Улар орасида ракета, ракета двигатели ва қаттиқ ёнилғи ишлаб чиқарувчилар, махсус материаллар ҳамда дронлар тайёрловчи корхоналар, шунингдек, сувости кемаларига хизмат кўрсатувчи ташкилотлар бор.
Яна 77 нафар шахс Украинанинг вақтинча эгаллаб олинган ҳудудларида Россия Давлат думаси сайловларини ташкил этиш ва ўтказишда қатнашгани учун санксияга тушиши кутилмоқда. Бу рўйхатга номзодлар ва сайлов органлари вакиллари киритилади.
Бундан ташқари, вазирлар Шимолий Кореянинг Россия урушига кўмаги билан боғлиқ яна еттита номга нисбатан санксияларни сиёсий жиҳатдан маъқуллаши кутилмоқда. Ушбу чекловларни расман тасдиқлаш кейинроқ амалга оширилади.
Европа Иттифоқи Россиянинг Европадаги гибрид ҳужумларига жавобан ҳам алоҳида рўйхат тайёрламоқда. 12-октабр куни бу йўналишда, жумладан, Лейпсигдаги ҳужум билан боғлиқ 12 та ном бўйича сиёсий келишувга эришилиши мумкин. Расмий тасдиқ эса кейинроқ, эҳтимол, ноябрдаги ташқи ишлар вазирлари учрашувида бўлади.
Европалик дипломатларга кўра, мазкур чекловлар таниқли россиялик тарғиботчилар ва оммавий ахборот воситаларини ҳам қамраб олиши мумкин. Рўйхатга дезинформация кампанияларини ташкил этиш ва тарқатишни таъминловчи асосий тузилмаларни киритиш ҳам режалаштирилган. Якуний таркиб ва исмлар ҳозирча очиқланмаган.