Яшаш учун дунёдаги энг яхши мамлакат аниқланди
Рейтинг натижаларига кўра, 2026-йилда яшаш учун энг яхши мамлакат сифатида Эстония эътироф этилди. Болтиқбўйидаги ушбу давлат 72,8 балл тўплаб, 184 мамлакат орасида биринчи ўринни эгаллади.
Яшаш учун дунёдаги энг яхши мамлакат аниқланди
Иккинчи ўринни 72,6 балл билан Сингапур, учинчи ўринни эса 72,0 балл билан Малайзия эгаллади
Эстониянинг пешқадамликка чиқиши алоҳида эътиборга лойиқ. Аҳолиси қарийб 1,3 миллион кишидан иборат бу мамлакат хавфсизлик ва яшаш учун қулай шароит яратиш кўрсаткичларида юқори натижа қайд этган. Бунга самарали ҳуқуқий тизим, ривожланган стартап экотизими ҳамда ёшлар орасида ишсизлик даражасининг пастлиги асосий омиллардан бири сифатида кўрсатилган.
Болтиқбўйи давлатлари орасида бошқалар ҳам яхши натижа кўрсатди. Литва 71,0 балл билан 10-ўринни, Латвия эса 68,7 балл билан 18-ўринни эгаллаб, дунёдаги энг яхши 20 та мамлакат сафидан жой олди.
Умуман олганда, кучли йигирматаликнинг ярми Европа давлатларига тўғри келган. Жумладан, Португалия 71,6, Чехия 69,9 ва Малта 69,8 балл тўплаган.
Европа мамлакатларининг юқори ўринларни эгаллашида тиббий хизмат сифати ва умумий турмуш даражаси муҳим рол ўйнаган. Шу билан бирга, Жанубий ва Шарқий Европада яшаш харажатларининг нисбатан мақбуллиги айрим давлатларга қўшимча устунлик берган. Хусусан, Болгария ва Кипр 69,7 баллдан тўплаб, Шимолий ва Ғарбий Европанинг айрим машҳур мамлакатларини ортда қолдирган.
Шарқий ва Жануби-Шарқий Осиё давлатлари ҳам рейтингда юқори натижалар қайд этган. Тайван 71,4 балл билан дунёда 5-ўринни эгаллаган. Бруней 69,3 ва Япония 69,1 балл билан кучли йигирматаликдан жой олган.
Рейтингнинг қуйи қисмида эса Африка мамлакатлари устунлик қилади: охирги 20 та ўриндан 13 таси қитъа давлатларига тўғри келган.
Африка мамлакатлари орасида энг паст кўрсаткич Жанубий Суданда — 42,3 балл. Бироқ умумий рейтингда энг паст натижа Афғонистонда қайд этилган — 39,5 балл. Яман эса 41,4 балл билан рейтингнинг сўнгги ўринларидан бирини эгаллаган.