“Яқин Шарқ бўйича сиёсатимиз Исроилга тобе бўлишига йўл қўймаймиз” — АҚШ вице-президенти
“Яқин Шарқ бўйича сиёсатимиз Исроилга тобе бўлишига йўл қўймаймиз” — АҚШ вице-президенти
АҚШ вице-президенти Жей Ди Венс мамлакатининг Яқин Шарқ бўйича сиёсати Исроилга бўйсунишини истамаслигини билдирди. У президент Доналд Трампнинг Исроил билан алоқаларни узишга тайёр бўлиш эҳтимолини ҳам инкор этмади.
Венснинг айтишича, АҚШ учун Исроил ҳарбий технологиялар ва разведка маълумотлари алмашинувида муҳим шерик ҳисобланади. Бироқ икки давлат келиша олмайдиган ҳолатлар ҳам бўлган.
“Менимча, у (Трамп) сўнгги 40 йил ичидаги ҳар қандай президентдан кўра кўпроқ, Америка халқининг манфаатлари Исроил ҳукуматининг манфаатларидан фарқ қилишини ҳис қилганда, Биби Нетаняху билан алоҳида йўлдан кетишга тайёрлигини кўрсатди... Доналд Трамп сўнгги 40 йил ичида ъБиби яхши ҳамкор, аммо у ва менинг бу борадаги қарашларимиз турличаъ ёки ъБу масалада Биби ноҳақъ, ъИсроил нуқтаи назаридан Биби ҳақ, аммо Америка халқи биздан бошқа йўналишда ҳаракат қилишимизни хоҳлайдиъ, дейишга тайёр бўлган ягона президентдир”, деди АҚШ вице-президенти Жей Ди Венс.
У мулоқот юритиш учун Исроил билан муносабатлар ҳам, бошқа алоқалар сингари, аввало Америка манфаатларига таяниши кераклигини таъкидлади. Венс бу қоида НАТОга ҳам тегишли эканини қўшимча қилди.
“НАТО билан кўплаб муҳим алоқалар, ҳамкорликлар мавжуд, аммо бу Европа ташқи сиёсатимизни бутунлай НАТОга тобе қилиб қўямиз дегани эмас, худди Яқин Шарқдаги ташқи сиёсатимизнинг Исроил давлатига бўйсунишига йўл қўя олмаслигимиз каби”, деди Венс.
“Биз одамлар билан ишлашимиз керак бўлганда ишлаймиз, келишмаган пайтимизда эса келишмаймиз. Биз Америка манфаатларини кўзлаймиз. Оқилона ташқи сиёсат юритишнинг ягона йўли шу”, дея хулоса қилди АҚШ вице-президенти.
### АҚШ вице-президенти Исроилга қарши турли баёнотлар билан чиқмоқда
Июл ойида Жей Ди Венс Исроил ҳукумати аъзолари Қўшма Штатлар ва Эрон ўртасидаги урушни якунлашга қаратилган келишувга қарши чиқиш учун Америка жамоатчилик фикрига таъсир ўтказишга уринганини айтганди.
Келажакда президентликка потенсиал номзод сифатида кўрилаётган Венснинг бу баёноти икки давлат ўртасидаги келишмовчилик кучайиб бораётганидан далолат беради. АҚШ вице-президенти июн ойида Эрон билан урушни якунлаш бўйича имзоланган келишувни ҳимоя қилган. Исроил эса ушбу келишувни қоралаган.
Ўшанда Венс Исроилга хайрихоҳ бўлган дунёдаги ягона давлат раҳбари президент Трамп эканини таъкидлаган. У Америка ушбу мамлакатга миллиардлаб долларлик мудофаа ёрдами ажратганини эслатган.
“Менинг уларга айтадиган гапим икки қисмдан иборат. Биринчидан: Доналд Трамп айни пайтда бутун дунёда Исроил халқига хайрихоҳ бўлган ягона давлат раҳбаридир. Агар мен Исроил ҳукумати кабинетида бўлганимда, бутун дунёда ўзимга қолган ягона қудратли иттифоқчига ҳужум қилмаган бўлардим”, деган эди Венс Исроил бошҳ вазири Бинямин Нетаняхуга мурожаат қилиб.
Аммо Исроил бош вазири бунга жавобан АҚШ энг буюк дўст экани, аммо бошқа ҳамроҳ давлатлар ҳам борлигини таъкидлаган.
“Мен Жей Ди Венсни ҳурмат қиламан, бизнинг муносабатларимиз жуда яхши, аммо бу унинг ҳамма гапларига қўшилишимни англатмайди. Шуни таъкидлашим керакки, Доналд Трамп Оқ уйдаги энг буюк дўстимдир. Бизнинг бошқа дўстларимиз ҳам бор, масалан, 1,4 миллиард аҳоли яшайдиган Ҳиндистон номли унчалик катта бўлмаган мамлакат ва у ерда бизни жуда кўплар қўллаб-қувватлайди”, деган эди у.
Шунингдек, Нетаняху дунёнинг кўплаб давлатлари етакчилари унга қўнғироқ қилиб, ҳурматларини изҳор этишини айтганди.