“Хитой Эронни яккалатиб қўйишда ёрдамга тайёр” — АҚШ вице-президенти
“Хитой Эронни яккалашда ёрдам беришга тайёр” — АҚШ вице-президенти
АҚШ вице-президенти Жей Ди Венс Хитой Эронни яккалаб қўйиш борасида ёрдам кўрсатишга тайёр эканини маълум қилди. Унинг сўзларига кўра, Ҳормуз бўғози орқали нефт ташиш ҳажми деярли урушдан олдинги даражага қайтган ва Эрон стратегик сув йўли устидан назоратини йўқотган.
“Уч ой олдинги ҳолатни эсласак, Эрон таҳдидлари сабабли бўғоздан деярли нефт ва газ чиқмаётган эди. Ҳозир эса кўрсаткичлар уруш бошланишидан олдинги даражага етди”, деди Венс Оқ уйдаги брифингда.
Венснинг айтишича, Эроннинг Ҳормуз бўғозидаги назорати амалда якунланган. АҚШ эса Теҳрон кемаларга қарата ўт очишни тўхтатмагунча у билан музокара олиб бормайди.
Вице-президент, шунингдек, Хитой Эронни иқтисодий жиҳатдан яккалашга қаратилган саъй-ҳаракатларда ҳамкорлик қилишга тайёрлигини айтди. Хитой дунёдаги энг йирик хом нефт импортчиси бўлиб, узоқ вақтдан бери Эрон нефтининг асосий харидорларидан бири ҳисобланади. Шу боис Пекин Вашингтоннинг Теҳронга иқтисодий босим ўтказиш режаларида муҳим аҳамиятга эга.
Бундан ташқари, Венс АҚШ Эрон жанубидаги тўйда юз бергани айтилаётган зарбани текшираётганини билдирди. Эрон расмийларига кўра, бу ҳужум оқибатида 4 киши, жумладан, бир бола ҳалок бўлган ва 68 киши яраланган.
Хабарларга кўра, зарба 2-сентябрга ўтар кечаси Ҳормуз бўғози бўйидаги Куҳестак соҳил бўйи шаҳарчасида бўлиб ўтаётган тўй маросимига берилган. Эрон расмийлари бунинг учун АҚШни айблаб, ҳужумни уруш жинояти деб атади.
“Бу ҳолатни текширяпмиз”, деди Венс ва шу билан бирга Теҳрон берган маълумотга шубҳа билан қарашини қўшимча қилди.
“Эрон давлат ОАВ шу пайтгача можарода нима содир бўлгани ҳақида тўғри ахборот бермади. Шунинг учун мен бунга шубҳа билан қарайман”, деди у.
АҚШ Марказий қўмондонлиги бу зарба юзасидан аниқ муносабат билдирмади. Бироқ АҚШ ҳарбийлари ҳеч қачон тинч аҳолини нишонга олмаслигини таъкидлади.
Сўнгги воқеалар АҚШ ва Исроилнинг 28-феврал куни Эронга қарши бошлаган бомбардимонларидан кейин Вашингтон ва Теҳрон ўртасида давом этаётган кескинлик фонида юз бермоқда. Апрел ойидаги оташкесим шиддатли жангларнинг биринчи босқичига чек қўйган эди. Шунга қарамай, Ҳурмуз бўғози ва унинг атрофида вақти-вақти билан тўқнашувлар давом этмоқда.