АҚШнинг айрим ҳудудларида 100 тадан кам Патриот ракетаси қолди — НЙТ

АҚШнинг айрим ҳудудларида 100 тадан кам Патриот ракетаси қолди — НЙТ

АҚШ вице-президенти Жей Ди Венс Эрон билан уруш давомида Американинг муҳим ўқ-дорилар захираси тарихий минимумга тушгани ҳақида ҳарбий қўмондонлардан огоҳлантириш олган.

Баҳор ва ёз ойларида Венс Яқин Шарқ, Европа ва Осиёдаги америкалик қўмондонлар билан бевосита боғланиб, Эрон билан уруш юзасидан уларнинг баҳоларини сўраган. Вице-президент, шунингдек, қурол-яроғнинг Яқин Шарққа юборилиши АҚШнинг Хитой, Россия ва Шимолий Кореяни тийиб туриш имкониятига қандай таъсир қилаётганига ҳам қизиққан.

Айниқса, қўмондонларни Патриот ҳаво ҳужумидан мудофаа тизимлари учун мўлжалланган тутиб олувчи ракеталар захирасининг қисқариши ташвишга солган. Баҳор охирига бориб АҚШнинг ҳарбий ҳудудларидан бирида бундай ракеталардан 100 тадан кам қолган.

Шунингдек, Эрон билан уруш қарийб 300 километр масофадаги нишонларга зарба бера оладиган АТАСМС ракеталари ва уларнинг ўрнини босиши керак бўлган янги Пресисион Стрике Миссиле (ПрСМ) захираларига ҳам жиддий таъсир кўрсатган.

Ҳарбийлар Венсга ушбу турдаги муҳим ўқ-дорилар захираси улар кузатув олиб борган даврдаги энг паст даражага тушганини билдирган. Бу эса Эроннинг жавоб зарбаларини қайтариш билан бир пайтда бошқа минтақалардаги эҳтимолий таҳдидларга қарши туриш имкониятлари борасида саволларни келтириб чиқарган.

НЙТ манбаларига кўра, Венс олган маълумотлар Эрон ҳукумати АҚШ кутганидан кўра кўпроқ босимга бардош бера олаётганини ҳам кўрсатган. Вице-президент ушбу баҳоларни Доналд Трамп ва унинг энг яқин маслаҳатчилари билан ёпиқ суҳбатларда муҳокама қилган.

Айни пайтда Трамп Штаб бошлиқлари бирлашган қўмитаси раиси генерал Ден Кейндан Америка ўқ-дори захираларига тушаётган босим ва Эрон кучларининг ҳолати ҳақида маълумот ола бошлаган. Президент дастлаб айрим баҳоларга ишонишда қийналган.

Бу маълумотлар Трамп маъмуриятининг оммавий баёнотларидан фарқ қилган. АҚШ президенти мамлакат Эрон билан урушда ғалаба қозонганини ва Америка қурол-яроғи захираларида муаммо йўқлигини бир неча бор таъкидлаган.

Қурол захираларининг камайиши ҳақидаги маълумотлар ошкор бўлгач, Пентагонда кенг кўламли текширув бошланган. Август ойида Штаб бошлиқлари бирлашган қўмитасининг қарийб 50 нафар ҳарбий ва фуқаролик ходими полиграфдан ўтказилган. Текширувнинг асосий мақсадларидан бири ўқ-дори захиралари ҳақидаги махфий маълумотларни ОАВга ким етказганини аниқлаш бўлган.

Венс уруш бошланганидан бир неча кун ўтиб вазият ҳақида батафсил маълумот тўплай бошлаган. У 28-февралдаги ҳужумдан олдин ҳам Эронга қарши уруш бошлашга қарши чиққан, бироқ Трамп қарор қабул қилгач, уни омма олдида ҳимоя қилган.

Пентагон дастлаб ҳарбий кампания тахминан олти ҳафта давом этишини ҳисобга олган. Жанглар бу муддатдан анча чўзилгач, бошқа ҳудудлардаги Америка қўмондонликларига ўз захираларидан Яқин Шарққа қўшимча ўқ-дорилар юбориш буюрилган.

Апрелга келиб Трамп уруш дастлаб режалаштирилганидек кетмаётганини англаб, Венс, Жаред Кушнер ва махсус вакил Стив Уиткоффга Эрон билан келишув йўлларини излашга рухсат берган. Музокаралар июн ойида 60 кунлик келишувга олиб келган, бироқ августда ушбу муддат якунланганда томонлар якуний битимга эриша олмаган.

АҚШ қурол захиралари камайиб бораётгани ҳақида аввал ҳам маълумотлар тарқалган. Август бошида Америка армияси Эрон билан уруш давомида АТАСМС ва ПрСМ узоқ масофали ракеталарининг катта қисмини сарфлаб бўлгани маълум қилинган эди. Ўшанда ҳарбий раҳбарлар Патриот ракеталари захираси ҳам камайиб бораётганидан огоҳлантирганди.

Март ойидаёқ Пентагон захираларни тўлдириш, жумладан Патриот ва ТҲААД ракеталарини харид қилиш учун Конгрессдан 200 млрд доллар қўшимча маблағ сўраган. Урушнинг дастлабки беш кунида АҚШ Патриот тутиб олувчи ракеталарининг ўзига тахминан 2,4 млрд доллар сарфлагани ҳақида ҳам маълумот берилган.