Япониянинг Окинава префектурасида аёл кишини ўлдиришда гумонланиб, АҚШ денгиз пиёдаси ҳибсга олинди
Япония ҳукумати АҚШга расмий норозилик билдириб, ҳарбий мулозимлардан чора кўришни талаб қилди.
АҚШ денгиз пиёдаси Япониянинг Окинава префектурасида аёл кишини ўлдирганликда гумонланиб ҳибсга олинди
Япониянинг Окинава префектурасидаги меҳмонхоналардан бирида аёл кишининг жасади топилганидан кейин АҚШ денгиз пиёдаси қотилликда гумонланиб ҳибсга олинди, деб хабар берди маҳаллий расмийлар.
Япония Бош вазири Санаэ Такаити ушбу жиноятни «шафқатсиз ва мудҳиш» талончилик ва қотиллик деб атади. У Окинава полицияси тергов олиб бораётган бир пайтда АҚШ томонига кескин норозилик билдирганини айтди.
Япониянинг NHK жамоатчилик телерадиокомпанияси қурбоннинг шахси 39 ёшли Яги Анна, гумонланувчи эса АҚШ Денгиз пиёдалари корпусининг «Футенма» авиабазасида хизмат қилувчи 20 ёшли Девин Жейкоб Баллард эканлигини маълум қилди.
«Биз денгиз пиёдаси томонидан содир этилган оғир жиноий ҳаракатлар тўғрисидаги айбловлар юзасидан Япония расмийлари билан фаол ҳамкорлик қилмоқдамиз», — дейилади Денгиз пиёдалари корпусининг ижтимоий тармоқлардаги баёнотида. Шунингдек, унда ҳалок бўлган аёлнинг оиласига ҳамдардлик билдирилган.
Япония Мудофаа вазири Синдзиро Коидзуми аёлнинг жасади шанба куни эрталаб Окинава префектурасининг маъмурий маркази Наха шаҳридаги меҳмонхонадан топилганини айтди.
«Бундай ҳодисани асло оқлаб бўлмайди ва бу мени қаттиқ ғазаблантирмоқда», — деб ёзди Коидзуми ижтимоий тармоқларда. У «АҚШ ҳарбий хизматчилари иштирокидаги воқеа ва ҳодисалар маҳаллий аҳолида жиддий хавотир уйғотиши ва бунга ҳеч қачон йўл қўйилмаслиги кераклигини» қўшимча қилди.
АҚШнинг Токиодаги элчихонаси Япония ҳукумати ва маҳаллий полиция билан тўлиқ ҳамкорлик қилаётганини билдирди. Япония Ташқи ишлар вазирлиги якшанба куни ушбу ҳодисани муҳокама қилиш учун АҚШ элчиси Жорж Глассни чақиртирганини маълум қилди.
Окинавада АҚШнинг бир нечта ҳарбий базалари жойлашган бўлиб, у ерда ўн минглаб америкалик аскарлар хизмат қилади.
Окинава губернатори Гента Кожа префектура АҚШдан бундай ҳодисаларнинг олдини олиш учун чоралар кўришни бир неча бор талаб қилганини айтди ва содир этилган жиноятни интизом йўқлигининг исботи деб билишини таъкидлади.
«Бу каби воқеанинг яна такрорланиши бизни АҚШ ҳарбийларининг интизомни сақлаш, шахсий таркибни тарбиялаш ва шу каби бошқа чора-тадбирлари мутлақо самарасиз деган хулосага келишга мажбур қилади», — деди у.