Япония иена курсини қўллаб-қувватлаш учун бир ойда рекорд даражада — 96,5 млрд доллар сарфлади
Япония иена курсини қўллаб-қувватлаш учун бир ойда рекорд даражада — 96,5 млрд доллар сарфлади
Япония ҳукумати миллий валюта – иенанинг қадрсизланишига қарши курашиш мақсадида валюта бозоридаги интервенсияларга сўнгги бир ой ичида мисли кўрилмаган миқдорда – 15,4 триллион иена (96,5 миллиард доллар) сарфлади.
Бу маблағлар 30-июлдан 26-августгача бўлган даврда ишлатилган. Интервенсиянинг кўлами Токио иенани сўнгги қарийб 40 йиллик энг паст даражалардан кўтаришга қанчалик жиддий уринаётганини кўрсатади. Миллий валютанинг заифлашуви Япония йирик экспортчилари учун фойдали бўлиши мумкин, аммо энергия каби импорт маҳсулотлари харажатларини оширади.
Япония энергия ресурсларининг деярли барчасини четдан импорт қилади, уларнинг қарийб 95 фоизи Яқин Шарқдан келади. Шу сабабли, минтақадаги уруш ва таъминотдаги узилишлар мамлакат иқтисодиёти учун қўшимча хавф туғдирмоқда.
Иенанинг заифлашишига Япония ва бошқа йирик иқтисодиётлар ўртасидаги фоиз ставкалари тафовути ҳам таъсир қилмоқда. Япония Марказий банки июл ойидаги йиғилишида асосий ставкани ўзгартирмаган бўлса-да, регулятор вакиллари пул-кредит сиёсатини қатъийлаштириш суръатини оширишга тайёр эканини билдирган. Бозор иштирокчилари сентябрдаги йиғилишда ставка оширилиши эҳтимолини 65 фоиз деб баҳоламоқда.
Япония Марказий банки 30 ва 31-июл кунлари иенани сотиб олиш орқали валюта бозорига аралашган. Бу жараёнда АҚШ билан кам учрайдиган қўшма интервенсия ҳам амалга оширилган. Жанубий Корея ҳам ўз вонини сотиб олиш операцияларини Япония интервенсияси билан бир вақтда ўтказган.
Ўша пайтда иена бир доллар учун қарийб 164 иена даражасига тушиб, сўнгги 40 йилдаги энг заиф кўрсаткичлардан бирини қайд этган.
Япония Марказий банкининг аввалроқ эълон қилинган маълумотларига кўра, фақат 30-июлдаги интервенсия ҳажми 9,6 трлн иенагача етган бўлиши мумкин. Бу 2026-йил 30-апрелда қайд этилган 6,3 трлн иеналик тасдиқланган кунлик рекорддан анча юқори.
Интервенсиядан сўнг иена курси дастлаб бир доллар учун 163 иенадан 155,20 иенагача мустаҳкамланган. Кейинчалик валюта курси барқарорлашиб, 10-августдан буён тахминан 159,50 иена атрофида сақланиб қолмоқда.
Молия вазирлиги эълон қилган 15,4 триллион иеналик умумий харажат бўйича ҳар бир кун кесимидаги батафсил маълумотлар чораклик ҳисобот эълон қилингач, ноябр ойининг бошларида тақдим этилиши кутилмоқда.
2022-йил сентябр–октябр ойларида ҳам Япония ҳукумати миллий валюта – иена курсини қўллаб-қувватлаш мақсадида валюта бозорига аралашганди. 29-сентябрдан 27-октябргача интервенсияларга 6,35 триллион иена (43,06 млрд доллар) сарфланган.