Янгиланган ВБС рейтингида ўзбекистонлик боксчиларнинг ўрни қандай?

Янгиланган ВБС рейтингида ўзбекистонлик боксчилар қандай ўринларни эгаллади?

Диққатга сазовор жиҳати шундаки, рейтингдан 11 нафар ўзбекистонлик чарм қўлқоп устаси жой олган.

Япониялик Наоя Иноуе мутлақ чемпион саналадиган биринчи ярим енгил вазн (-55,2 кг) тоифасида Муроджон Аҳмадалиев учинчи поғонада қайд этилган. Аҳмадалиев май ойида Тошкентдаги “Ҳумо Арена”да венесуелалик Ҳегли Москедани тўртинчи раундда техник нокаут орқали мағлуб этганди. Ушбу вазндаги яна бир ўзбекистонлик боксчи Муҳаммад Шехов эса 11-ўриндан 10-поғонага кўтарилди.

Енгил вазн (-61,2 кг) тоифасида ҳозиргача профессионал рингда мутлақо мағлуб бўлмаган Сирожбек Исмоилов (11 та жанг, 11 та ғалаба, 8 таси нокаут) рейтингнинг 16-поғонасидан жой олди.

Биринчи ярим ўрта вазн (-63,5 кг) тоифасида бирйўла уч нафар боксчи рейтингга кирган: Мужибилло Турсунов 29-ўринда, Шоҳжаҳон Эргашев 32-ўринда, Руслан Абдуллаев эса 35-поғонада бормоқда.

Супер ярим ўрта вазн (-69,9 кг)да Исроил Мадримов 7-ўринда қайд этилган. 30 ёшли боксчи профессионал рингда 14 та жанг ўтказиб, 11 та ғалаба, 2 та мағлубият ва 1 та дуранг қайд этган. У кетма-кет икки мағлубиятдан кейин Луис Давид Салазар устидан ғалаба қозониб, муваффақиятли қайтишни амалга оширди.

Супер ўрта вазн (-76,2 кг)да сўнгги жангида ганалик Сена Агбекони енгиб, ВБА қитъалараро камарини ҳимоя қилган Бектемир Мелиқўзиев бу сафар бир поғона юқорилаб, 5-ўринни эгаллади.

Супер оғир вазн (+101,6 кг) тоифасида Баҳодир Жалолов 13-ўриндан 11-поғонага кўтарилди. У профессионал боксда 18 та жанг ўтказиб, шуларнинг 16 тасини муддатидан олдин якунлаган. Манчестерда бўлиб ўтган сўнгги жангида у хорватиялик Агрон Смакичини нокаутга учратганди. Яна бир ўзбекистонлик боксчи Лазизбек Муллажонов эса 22-ўринга кўтарилди.