ВБС рейтинги янгиланди: ўзбекистонлик боксчилар нечанчи ўринлардан жой олгани маълум бўлди

ВБС рейтинги янгиланди: Ўзбекистонлик боксчиларнинг ўринлари маълум бўлди

Бутунжаҳон бокс кенгаши (ВБС) август ойи якунлари бўйича профессионал боксчиларнинг янгиланган рейтингини эълон қилди. Ушбу рўйхатдан жами 11 нафар ўзбекистонлик чарм қўлқоп устаси турли вазн тоифаларида жой олди.

Биринчи ярим енгил вазн (-55,2 кг) тоифасида, япониялик Наоя Иноуе мутлақ чемпион бўлган дивизионда, Муроджон Аҳмадалиев учинчи ўринни эгаллади. Шу вазнда яна бир ўзбекистонлик боксчи Муҳаммад Шехов 12-поғонадан 11-ўринга кўтарилди. Енгил вазн (-61,2 кг) тоифасида профессионал рингда мағлубиятга учрамаган Сирожбек Исмоилов (11 жанг, 11 ғалаба, 8 нокаут) 16-ўринда қайд этилди.

Биринчи ярим ўрта вазн тоифасида (-63,5 кг) уч нафар боксчи рейтингдан жой олди: Мужибилло Турсунов 27-ўринда, Шоҳжаҳон Эргашев 31-ўринда ва Руслан Абдуллаев 34-поғонада бормоқда. Супер ярим ўрта вазнда (-69,9 кг) Исроил Мадримов 8-ўринни эгаллади.

Супер ўрта вазнда (-76,2 кг) сўнгги жангида ганалик Сена Агбеконини мағлуб этиб, ВБА қитъалараро камарини ҳимоя қилган Бектемир Мелиқўзиев бу сафар бир поғона пастлаб, 6-ўринга тушди.

Супер оғир вазн тоифасида (+101,6 кг) Баҳодир Жалолов 13-ўринга тушди. У профессионал боксда 18 та жанг ўтказиб, барчасида муддатидан олдин ғалаба қозонган. У Манчестердаги сўнгги жангида хорватиялик Агрон Смакичини нокаутга учратганди. Лазизбек Муллажонов эса 24-ўринга кўтарилди.