Яман ҳусийлари Қизил денгиздаги яна бир нечта оролни эгаллаб олди
Яман ҳусийлари Қизил денгиздаги яна бир нечта оролни эгаллаб олди
Яман ҳусийлари Қизил денгиздаги яна бир нечта стратегик оролларни эгаллаб олди. Бу ҳақда ҳукумат ва ҳусийлар вакилларига таяниб, АБС Невс хабар берди.
Катта ва Кичик Ҳанеш оролларининг эгалланиши Яман ҳукумати ҳарбийлари қарши ҳужумга тайёрланаётган бир пайтда юз берди. Ҳусийлар Боб ал-Мандаб бўғози атрофида ўз назоратини кучайтирган. Саудия Арабистони учун мазкур бўғоз нефт экспортида Ҳормузга муқобил денгиз йўли ҳисобланади.
Ҳусийларнинг янги ютуқлари уларга Саудия Арабистонининг Қизил денгиз орқали ташиладиган нефт юкларига таҳдид солиш имконини янада оширади. Шунингдек, вазият глобал нефт таъминоти ва нархларига ҳам таъсир қилади. Бу, ўз навбатида, ҳусийларни қўллаб-қувватлайдиган Эронга АҚШ билан урушда устунлик бериши мумкин.
Ҳусийлар Боб ал-Мандабдан 160 километр шимолда жойлашган Ҳанеш оролларига жангчиларини жойлаштирган. Оролларнинг эгалланиши ҳусийлар ўтган ҳафта Моха порт шаҳрини ва Боб ал-Мандаб бўғозида жойлашган Маюн оролини эгаллаганидан кейин юз берди. Ҳарбий манбаларга кўра, ҳусийлар Қизил денгизнинг жанубидаги Зуқар оролини ҳам ракета зарбалари ва қайиқлар ёрдамида уюштирилган қуруқликдаги ҳужум натижасида назоратига олган.
Ҳусийларнинг олдинга силжиши уларни Боб ал-Мандаб бўғозининг нариги томонидаги Жибутида жойлашган АҚШ ҳарбий базасидан атиги 32 километр узоқликда қолдирди. Улар халқаро миқёсда тан олинган Яман ҳукумати кучларининг деярли қаршилигисиз оролларни эгаллаб олмоқда.