Хоразмда сув таъминоти корхонасининг ҳуқуқшуноси пора билан ушланди
Хоразмда сув таъминоти корхонасининг юрисконсульти пора олаётганда ушланди
Хоразм вилоятида «Хоразм сув таъминоти» корхонасининг юрисконсульти пора олаётган вақтда ушланди. Бош прокуратура ҳузуридаги Департамент томонидан хабар қилинишича, у мукофот эвазига ичимлик суви таъминоти тизимига ноқонуний уланишни расмийлаштириб беришни ваъда қилган.
Тергов маълумотларига кўра, корхона ходими тадбиркорнинг ишончига кириб, савдо объектини ичимлик суви таъминоти тизимига улаш масаласини ҳал қилишни таклиф этган. У юқори лавозимлардаги танишлари орқали зарур техник ҳужжатларни расмийлаштириб бера олишига ишонтирган.
Эркак 6 миллион сўмни олаётган вақтда ушланган. Идора томонидан маълум қилинишича, у илгари ҳам судланган.
Мазкур ҳолат юзасидан жиноят иши қўзғатилган. Ҳозирда содир бўлган воқеанинг барча тафсилотларини аниқлашга қаратилган тергов ҳаракатлари олиб борилмоқда.
Аввалроқ Тошкент вилоятида деярли тўрт миллиард сўмлик сув қувурлари талон-торож қилингани аниқланган эди.