Хитойда рекордчи темирйўл-автомобил кўприги қурилмоқда
Хитойнинг Чжецзян провинсиясида қурилаётган Сихоумен темирйўл-автомобил кўпригида илк йўналтирувчи трос бўғоз устидан дрон ёрдамида тортилди. Умумий узунлиги 3 118 метр бўладиган иншоот асосий оралиғи бўйича дунёдаги энг йирик темирйўл-автомобил кўприги бўлиши кутилмоқда.
Хитойда рекорд ўрнатиши кутилаётган темирйўл-автомобил кўприги бунёд этилмоқда
Накед Ссиенсе нашрининг хабар беришича, оғир юк кўтарувчи дрон 5-рақамли таянч минора тепасидан учиб чиқиб, диаметри 2,5 миллиметр ва узунлиги 1 700 метр бўлган тросни олиб ўтган. Трос юқори мустаҳкамликка эга Дйнеема толасидан тайёрланган.
Дрон кемалар гавжум бўлган бўғозни 10 дақиқада кесиб ўтиб, тросни 4-рақамли таянч минорадаги белгиланган нуқтага етказган. Шу тариқа Сези ва Сзинтан ороллари қирғоқларидаги икки асосий таянч бир-бирига уланган.
Бу эса кўприк қурилиши учун зарур бўлган осма иш йўлакчасини ўрнатишни бошлаш имконини беради. Кейинчалик айнан шу йўлакча орқали кўприкнинг юқори конструксиялари монтаж қилинади.
Сихоумен кўпригининг асосий қисми вантали ва осма конструксияларни уйғунлаштирган усулда қурилади. Асосий оралиқ 1 488 метрни, кўприк қатнов қисмининг кенглиги эса 68 метрни ташкил этади.
Манбага кўра, қурилиш тугагач, у денгиз устидан қурилган дунёдаги энг кенг кўприк бўлиши кутилмоқда. Шунингдек, иншоот вантали ва осма тизимлар бирлаштирилган кўприклар орасида ҳам рекорд ўрнатиши режалаштирилган.
Лойиҳа темирйўл-автомобил кўприклари орасида энг катта асосий оралиқ, энг катта кенглик ва энг баланд асосий таянч миноралар каби кўрсаткичлар бўйича жаҳон рекордларига даъвогарлик қилмоқда. Қояга маҳкамланадиган анкер тизими ва бурғилаб қуйиладиган қозиқлар асосидаги пойдевор ўлчамлари ҳам рекорд даражада бўлиши кўзда тутилган.
Йўналтирувчи трос кейинги тортиш арқонлари ва монтаж элементларини кўприк оралиғидан ўтказиш учун хизмат қилади. Бундай ишларда вертолёт, кема ёки дронлардан фойдаланиш мумкин.
Сихоумен акваториясида кучли шамол, баланд тўлқинлар ва интенсив кема қатнови қурилишни мураккаблаштиради. Шу сабабли Нингбо-Зҳоушан Раилвай ва Чина Раилвай Мажор Бридге Энгинееринг Гроуп мутахассислари турли усулларни солиштириб, дрондан фойдаланишни танлаган.
Бу усул тайёргарлик ва ҳаводаги ишлар вақтини қисқартириб, халқаро кема қатнови йўлида ҳаракатни чеклаш муддатини камайтириш имконини берган.