Хитой Ўзбекистонга J-10 қирувчи самолётлари етказиб берилишини тушунтирди

Хитой Ўзбекистонга J-10 қирувчи самолётлари етказиб берилишига тушунтириш берди

Хитойнинг J-10CE кўп мақсадли қирувчи самолётларини Ўзбекистонга етказиб бериши ҳеч қандай учинчи мамлакатларга қарши қаратилмаган. Бу ҳақда ХХР Мудофаа вазирлиги расмий вакили Цзян Бинь маълум қилди.

Унинг сўзларига кўра, Хитой ва Ўзбекистон ўртасидаги ҳарбий ҳамкорлик дўстона руҳда ривожланмоқда, қурол-яроғ етказиб бериш эса халқаро ҳуқуқ ва шаклланган халқаро амалиётга мос келади.

"Томонлар ўртасида ҳарбий савдо соҳасидаги ҳамкорликнинг нормал ривожланиши халқаро ҳуқуқ ва халқаро амалиётга мос келади ҳамда бирор-бир учинчи томонга қарши қаратилмаган", — деди Цзян Бинь.

Август ойида Ўзбекистон Мудофаа вазирлиги илк бор мамлакат Ҳарбий-ҳаво кучлари қуролланишига қабул қилинган J-10CE қирувчи самолётлари акс этган видеони эълон қилган эди.

Ўзбекистон Покистондан кейин ушбу моделнинг иккинчи хорижий буюртмачисига айланди. Аввалроқ J-10CE самолётларига Жазоир, Бангладеш, Миср, Индонезия ва Судан ҳам қизиқиш билдирган эди. Хитой бу ерда гап бошқа давлатлар билан қарама-қаршилик ҳақида эмас, балки мудофаа соҳасидаги савдо ҳақида кетаётганини таъкидламоқда.