Харкивда дрон ҳужумидан 6 киши ҳалок бўлди
Харкив вилоятининг Новая Водолага шаҳарчасидаги боғга Россия дрони зарба бериши оқибатида олти киши ҳалок бўлди. Қурбонлар орасида бир ва 11 ёшли болалар бор. Яна 15 киши, жумладан, етти бола жароҳатланган.
Харкивда дрон ҳужуми оқибатида 6 киши ҳалок бўлди. ДВ хабарига кўра, ҳодиса 19-октабр куни, боғда болали оилалар ҳордиқ чиқараётган вақтда юз берган. Харкив вилояти маъмурияти раҳбари Олег Синегубов зарба Шаҳед туридаги дрон орқали берилганини билдирган.
Украина президенти Володимир Зеленскийнинг айтишича, дрон оддий кафе ёнидаги боғга келиб урилган.
Ҳалок бўлганлар орасида бир ёшдан энди ошган Ангелина исмли қиз ҳам бор. Зеленскийнинг маълумотига кўра, у 2025-йил августда туғилган. Қизнинг онаси Инна эса шифохонада вафот этган.
Ҳужумдан кейин Зеленский ҳамкор давлатларни Украинанинг ҳаво ҳужумидан мудофаа имкониятларини кучайтиришга чақирган. У тинч аҳоли ҳаётини ҳимоя қилиш учун қўшимча мудофаа воситалари зарурлигини таъкидлаган.
Шунингдек, Украина президенти АҚШ ва Европа мамлакатларини Россияга қарши санксияларни бекор қилмасликка, Киевни қўллаб-қувватлашни давом эттиришга ҳамда Вашингтоннинг Москвага қарши янги санксияларини кучга киритишга ундаган.
«Биз тинчлик ўрнатилиши ва хавфсизлик кафолатланиши учун барча имкониятларни ишга солишни сўраймиз. Украина тинчликни хоҳлайди», - деган Зеленский.