WhatsApp ўсмирлар учун ихтиёрий ота-она назорати функциясини жорий қилмоқда
Ижтимоий хабар алмашиш иловаси ота-оналарга фарзандининг аккаунти учун махфийлик созламаларини белгилаш имконини беради.
Технология компаниялари болалар учун ёшига мос келадиган қулайликлар яратиш борасида кучайиб бораётган босимга дуч келаётган бир пайтда, WhatsApp ўсмирлар учун ихтиёрий ота-она назорати функциясини жорий қилмоқда.
Ижтимоий мессенжернинг янги функциялари ота-оналарга бир нечта имкониятларни тақдим этади, жумладан, фарзанди бирор гуруҳга қўшилганда ёки ундан чиққанда хабарнома олиш. Шунингдек, улар аккаунт учун махфийлик созламаларини белгилашлари мумкин бўлади.
Блогпостида WhatsApp ота-оналар ўсмир фарзандлари юборадиган ёки қабул қиладиган хабарларни ўқий олмаслигини, ушбу хабарлар ва қўнғироқлар махфий бўлиб қолишини ҳамда шифрлаш (end-to-end encryption) билан ҳимояланишини тушунтириб ўтди.
Компания ушбу назорат воситалари ихтиёрий эканини маълум қилди, ижтимоий тармоқлар таҳлилчиси Мэтт Наварра эса буни «яққол заифлик» деб атади.
Унинг сўзларига кўра, бу қадам WhatsApp эгаси бўлган Meta компанияси учун «анча қулай» бўлди, чунки бу масъулиятнинг бир қисмини ота-оналар ва ўсмирлар зиммасига юклаш орқали компаниянинг фойдаланувчи ёшини текширишга бўлган қарамлигини камайтиради.
«Meta регуляторларга бизда болалар хавфсизлиги тизими бор, ота-она назорати мавжуд ва биз уни ўз платформаларимизда жорий этяпмиз, деб кўрсатишга ҳаракат қилмоқда», деди у.
«Менимча, энг катта очиқ қолган савол — етарлича оилалар ундан ҳақиқатан ҳам фойдаланадими-йўқми, деган масаладир».
Буюк Британияда WhatsApp'дан фойдаланиш учун минимал ёш 13 ёшни ташкил этади, гарчи баъзи мамлакатларда бу кўрсаткич юқорироқ бўлса ҳам.
Компания маълумотларига кўра, ота-оналар исталган вақтда назорат созламаларини ўзгартиришлари ёки ўчириб қўйишлари мумкин бўлади.
Созламаларни ота-она томонидан танланган PIN-код ёрдамида «ўрнатиш осон» бўлади, агар ўсмирлар назоратни фаолиятдан чиқармоқчи бўлса, уларга ушбу код керак бўлади.
Янги махфийлик воситалари қаторига боланинг профиль расмини кимлар кўриши ва уни гуруҳларга кимлар қўшиши мумкинлигини ҳал қилиш имкониятлари киради.
Ота-оналар, шунингдек, ўсмир фарзандлари ташкилотлар ва жамоат арбобларига контент улашиш имконини берувчи Каналлардан қандай фойдаланишини ҳам белгилашлари мумкин.
Бундан ташқари, улар илованинг ихтиёрий ўрнатилган сунъий интеллект ёрдамчиси — Meta AI учун одатий 13+ созламасини ёки қаттиқроқ «Чекланган контент» (Limited Content) вариантини танлашлари мумкин бўлади.
«Ушбу назорат воситаларининг барчаси ота-оналар ва ўсмирлар ўртасида WhatsApp'дан қандай фойдаланиш бўйича очиқ суҳбатларни қўллаб-қувватлаш, шу билан бирга, ҳар бир фойдаланувчининг шахсий хабарлари махфийлигини сақлаш учун ишлаб чиқилган», деди компания.
Ушбу ўзгаришлар ҳукуматлар ва регуляторлар томонидан технология компанияларига ўз платформаларида болаларни яхшироқ ҳимоя қилиш учун иш фаолиятини ўзгартириш бўйича босим кучаяётган бир пайтда юз бермоқда.
Июнь ойида ҳукумат 16 ёшга тўлмаганларга ижтимоий тармоқлардан фойдаланишни тақиқлаш режасини эълон қилган эди, чекловлар 2027 йилнинг мартидан кучга кириши кутилмоқда.
Унда ижтимоий тармоқ фойдаланувчиларининг ёшини тасдиқлаш учун «юқори самарали ёшни аниқлаш» чораларидан фойдаланилиши айтилган.
Ҳозирда WhatsApp ушбу тақиқдан мустасно, чунки ҳукумат уни хабар алмашиш хизмати (мессенжер) сифатида таснифлайди.